კარგი იქნება, თუ ქალბატონი დეგნანი უფრო ფოკუსირებული იქნება რეალურ ავტორებზე, ვინც ამ სანქციებზე დღე და ღამ საუბრობს. ასე გამოეხმაურა ,,ქართული ოცნების“ წევრი ირაკლი ზარქუა კელი დეგნანის განცხადებას.
მისივე თქმით, დეგნანმა ბევრს ცივი წყალი გადაასხა, როდესაც განაცხადა, რომ კონკრეტული ადამიანის სანქცირებას არავინ გეგმავს და თუ ასე მოხდება, ეს ღია და გამჭვირვალე იქნება.
,,სანქციების თემას ძალიან დიდ დროს თუ ვინმე უთმობს, მაგალითად, ხოშტარიები, „ნაციონალური მოძრაობის“ წარმომადგენლები, პოდოლიაკები, ერმაკები, არახამიები და ა.შ. და თუ ვინმეს ეკუთვნის შენიშვნა, კარგი იქნება, სწორი აქცენტები დაისვას. კარგი იქნება, თუ ქალბატონი დეგნანი უფრო ფოკუსირებული იქნება რეალურ ავტორებზე, ვინც ამ სანქციებზე დღე და ღამ საუბრობს. მან ერთი ძალიან მნიშვნელოვანი განცხადება გააკეთა და ვეთანხმები. მან თქვა, როდესაც ამერიკის შეერთებული შტატები სანქციებზე და კონკრეტულ პიროვნებებზე საუბრობს, გადაწყვეტილებას იღებს, ეს არის ღია, გამჭვირვალე პროცესი, ყველასთვის ცნობილია და მსგავსი რამ არ იგეგმება. ამ ხელმოცარულებს, რომლებიც არიან პოლიტიკაში, როგორც შიგნით მავნებლები, ასევე საგარეო ფრონტზე, მათ შორის უკრაინაში, ამით კიდევ ერთხელ ცივი წყალი გადაასხა და თქვა, რომ დიახ, არავინ არ გეგმავს კონკრეტული ადამიანის სანქცირებას და თუ იქნება, ეს იქნება ღია, გამჭვირვალე და ამას თეთრი სახლი პირდაპირ ატყობინებს. ამით ეს დისკუსია მოკვდა“ _ აღნიშნა ირაკლი ზარქუამ.
როგორც კელი დეგნანმა ,,ინტერპრესნიუსთან“ საუბრისას განაცხადა, მისთვის ,,დამაბნეველია, რამდენ დროსა და ენერგიას ხარჯავს ზოგიერთი სანქციების, ან სხვის ფულთან დაკავშირებული საკითხების განხილვაზე, იმის ნაცვლად, რომ ყურადღება კონცენტრირებული იყოს მკაფიო გზამკვლევზე ევროკავშირის წევრობისკენ“.
