ალეკო ელისაშვილი მზად არის მონაწილეობა მიიღოს ნებისმიერი მოლაპარაკების ფორმატში იმ ადამიანებთან, ვისი პოზიციაც ,,ქართული ოცნების“ ხელისუფლებიდან გაშვება და ,,ნაციონალური მოძრაობის“ ხელისუფლებაში არ დაბრუნებაა.

,,არ მიმაჩნია მთლად სერიოზულად რაც თქვა გიორგი მარგველაშვილმა. ჩემს პირად და ჩვენს პარტიულ პოზიციას ვიტყვი, რომ ,,ქართული ოცნება“ უნდა წავიდეს ხელისუფლებიდან აუცილებლად, რადგან ეს არის აბსოლუტურად უიდეო და გამოფიტული ძალა, რომელიც თავის თავსაც აწვალებს ხელისუფლებაში ყოფნით და მით უფრო ქვეყანას. მაგრამ ,,ნაციონალური მოძრაობა“ არ უნდა მოვიდეს ხელისუფლებაში. მე, პირადად შევალ ნებისმიერ საბჭოში, ნებისმიერი მოლაპარაკების ფორმატში, სადაც ანალოგიურ პოზიციაზე მყოფი პოლიტიკური ძალები იქნებიან, ვისაც უნდა, რომ ,,ქართული ოცნება“ გავუშვათ ხელისუფლებიდან და ამავე დროს უნდა, რომ ,,ნაციონალური მოძრაობა“ არ დავაბრუნოთ ხელისუფლებაში, რომ კიდევ უარესი არ დავატეხოთ ამ ქვეყანას. ვინც ასე ფიქრობს, ვისაც ასეთი პოზიცია აქვს, ნებისმიერ პოლიტიკურ თუ არაპოლიტიკურ ლიდერთან, მე პირადად, მზად ვარ ვილაპარაკო. მაგრამ ის, ვისაც უნდა, რომ ,,ნაციონალური მოძრაობა“ დააბრუნოს ხელისუფლებაში, მე პირადად და ჩვენ პარტიას მათთან არაფერი საერთო არ გაქვს. ამიტომ, კარგი იქნება, თუ დააზუსტებს ვანო მერაბიშვილი, ის საბჭოს შექმნას აპირებს მერაბიშვილთან და კეზერაშვილთან ერთად თუ რამე სხვა იდეები აქვს“ _ განაცხადა ალეკო ელისაშვილმა.

როგორც დეპუტატი აცხადებს, ახლა ქვეყნისთვის პირველი რიგის ამოცანა 12 პუნქტის შესრულება და ევროკავშირის წევრის სტატუსის მიღებაა. მისივე თქმით, თუ ოპოზიციას ხელისუფლების შეცვლა უნდა, 2024 წლის არჩევნებისთვის სერიოზულად უნდა მოემზადოს. ელისაშვილის განცხადებით, ვადამდელი არჩევნების მოთხოვნა არ არის რელევანტური.

,,ვადამდელი არჩევნები ახლა რომ ჩავატაროთ, კონსტიტუციის მიხედვით 2024 წლის ოქტომბერშიც უნდა ჩავატაროთ. გამოდის, რომ ახლა ვითხოვთ ერთწლიან პარლამენტს. თან თუ ჩავხედავთ, ვნახავთ, რომ ახლა რომ ვადამდელი ჩატარდეს, ჩატარდება არა სრულად პროპორციული, რისთვისაც თავს ვიკლავდით, არამედ ჩატარდება 120/30-ზე პრინციპით. და ისევ იქნება 30 მაჟორიტარი პარლამენტში, (სარკასტულად რომ ვთქვათ) შეგვიძლია არც გამოვცვალოთ ის მაჟორიტარები, პირდაპირ დავტოვოთ. ამიტომ, მშვიდად, უემოციოდ თუ შევხედავთ, ვადამდელი არჩევნების მოთხოვნა არ არის ახლა რელევანტური და არ არის სერიოზული. როგორ გასვლას აპირებს არჩევნებზე ოპოზიცია, ერთმანეთს რომ ვლანძღავთ ამ ფორმატში კეზერაშვილის დაფინანსებულ კამპანიაში უნდათ მონაწილეობა? ჯობია, რომ მოვემზადოთ, ახლა პირველი რიგის ამოცანაა 12 პუნქტის შესრულება და სტატუსის მიღება, ეს არის ახლა ნებისმიერ არჩევნებზე უფრო მნიშვნელოვანი, ეს შესაძლებლობა ხელიდან არ უნდა გავუშვათ და შემდეგ მოვემზადოთ არჩევნებისთვის. ასე ჰარი-ჰარალოზე და სადღეგრძელოებით რომ გავდივართ არჩევნებზე, იმიტომაა, რომ 10 წელია ,,ქართული ოცნება“ ხელისუფლებაში. თუ მოგება გვინდა, არჩევნებში თავისუფლად შეიძლება ,,ქართული ოცნების“ დამარცხება, მაშინ უფრო სერიოზულად უნდა ავწონ-დავწონოთ და მოთხოვნებიც უფრო სერიოზული უნდა გვქონდეს“ _ აცხადებს ელისაშვილი.