,,ქართულმა ოცნებამ“ ძალიან დაიზიანა თავი, პირდაპირ ყველა ვეუბნებოდით, რომ იმ კანონის მიღებით ფოცხს ნუ დააბიჯებ ფეხს, მაგრამ მათ ძალიან ენერგიულად დააბიჯეს იმ ფოცხს ფეხი და არიან ახლა დარეტიანებული. ამ დარეტიანებულ ,,ქართულ ოცნებას“ რეტიდან გამოსვლაში ახლა ეხმარება ვანო მერაბიშვილი,“- ასე აფასებს პარტია „მოქალაქეების“ ლიდერი ალეკო ელისაშვილი ქვეყნის პოლიტიკურ სივრცეში მიმდინარე პროცესებს.

„თუ ვინმეს ჭკუა მოეკითხება ,,ნაციონალურ მოძრაობაში“, ერთი მარტივი რამ უნდა გააკეთოს - ვანო მერაბიშვილს პირზე ,,სკოჩი“ ააკრან. ერთადერთი მისია აქვს ვანო მერაბიშვილს, რომ ყველას გაგვახსენოს, ,,ქართული ოცნება“ ხელისუფლებიდან კი გასაშვებია, მაგრამ დავფიქრდეთ, იქნებ ის უარესი ხალხი დაბრუნდეს. ამას აკეთებს ვანო მერაბიშვილი. დღეს ერთადერთი ფუნქცია აქვს ვანო მერაბიშვილს, რომ დაეხმაროს ,,ქართულ ოცნებას“ ამ კრიზისიდან გამოსვლაში, რომელიც თავს დაიტეხა თავისი უგუნურებით და ამპარტავნებით“ _ აცხადებს ალეკო ელისაშვილი.

მისივე თქმით, ,,ნაციონალური მოძრაობის" აქციაზე მისვლას არ აპირებს. 

„9 აპრილი ჩემთვის ძალიან მტკივნეულია, 11 წლის ვიყავი, როცა მოხდა და მას მერე ყოველთვის მივდივარ და დაღუპულთა ხსოვნას პატივს მივაგებ... ,,ნაციონალური მოძრაობის“ აქციაზე მისვლას არ ვაპირებ და მით უმეტეს, ვანო მერაბიშვილის მიერ გამოცხადებულ აქციაზე“ _ აცხადებს ელისაშვილი.