ქალბატონი სალომე ცოტა თავისებურია, ხასიათის ადამიანია და ეტყობა იმ ხასიათზე იყო მაშინ, როდესაც ინტერვიუში ბაქრაძეზე თქვა. ამის შესახებ ,,ქართული ოცნების“ წარმომადგენელმა ირაკლი ზარქუამ განაცხადა. როგორც იგი აღნიშნავს, პრეზიდენტმა გონივრული ნაბიჯი გადადგა, როდესაც მან გაერო-ში დავით ბაქრაძის ელჩად დანიშვნას ხელი მოაწერა.

,, პრეზიდენტმა ეტყობა გაანალიზა და შემდეგ გააკეთა დასკვნა, გადაწყვეტილება მიეღო, რომ დაენიშნა ელჩები, მათ შორის გაერო-ში დავით ბაქრაძე, რომელიც არის ძალიან კომპეტენტური, კვალიფიციური. მგონია, რომ სჯობს გვიან, ვიდრე არასდროს. ქალბატონი სალომე ცოტა თავისებური ადამიანია, ხასიათის ადამიანია და ეტყობა იმ ხასიათზე იყო მაშინ, როდესაც თქვა და მგონია, რომ შეუფერებელი იყო ის განცხადებები, რაც გააკეთა დიპლომატების და განსაკუთრებით, ბატონი დავითის მიმართ, თუმცა მან მაინც გადაწყვიტა, ხელი მოეწერა და დაენიშნა, აქ მაინც ვერავინ იტყვის, რომ ვინმემ აიძულა ან რაღაც. ქალბატონი სალომე არის დამოუკიდებელი მაქსიმალურად, გუნდისგან, ყველა ინსტანციისგან და თვითნებურად, თავისი გადაწყვეტილებით იღებს ამა თუ იმ გადაწყვეტილებას. ასე რომ, კიდევ ერთხელ მისასალმებელია, სწორი, გონივრული ნაბიჯის გადადგმა“ _ აღნიშნა ზარქუამ.

სალომე ზურაბიშვილმა გაერო-ში დავით ბაქრაძის ელჩად დანიშვნას 30 აგვისტოს მოაწერა ხელი. ცნობილია, რომ პრეზიდენტი გაერო-ში საქართველოს ახალი ელჩის დანიშვნაზე რამდენიმე თვის განმავლობაში უარს ამბობდა. წარსულში ბაქრაძე აშშ-ში საქართველოს ელჩი იყო.