ქალბატონ დეგნანს მინდა შევახსენო, ეს თემა ჰაერიდან არ მოგვიტანია, ომში ჩართვისკენ უკრაინის დაზვერვის სამმართველოს უფროსი და პრეზიდენტის მრჩევლები მოგვიწოდებდნენ. ამ სიტყვებით ,,ქართული ოცნების“ წევრი ირაკლი ზარქუა აშშ-ის ელჩის, კელი დეგნანის განცხადებას ეხმიანება.
მისი თქმით, ზელენსკის ადმინისტრაციის მრჩევლები იმასაც ამბობდნენ, ხელისუფლებაში ,,ნაციონალური მოძრაობა“ რომ ყოფილიყო, მეორე ფრონტი უკვე გახსნილი იქნებოდა.
,,მინდა გამოვეხმაურო ქალბატონი დეგნანის განცხადებას ომთან მიმართებაში, რომ ეს არის რუსული პროპაგანდა, მადლობა ამ პოზიციისთვის, მე მაშინ მინდა შევახსენო ქალბატონ დეგნანს, ჩვენ ეს თემა ჰაერიდან არ მოგვიტანია. ჩვენ ამისკენ მოგვიწოდებდა უკრაინის სადაზვერვო სამმართველოს უფროსი, რომ მეორე ფრონტი უნდა გაიხსნას, ზელენსკის ადმინისტრაციის მრჩევლები, რომლებიც ამბობდნენ - რა ცუდია, რომ სააკაშვილი და ,,ნაციონალური მოძრაობა" არ არიან ხელისუფლებაში, რადგან მეორე ფრონტი უკვე გახსნილი იქნებოდა. მაშინ ეს რა არის? ე.ი. ისინი რუსულ ინტერესებს ასახიერებდნენ? ანუ მათ უკან დგას რუსეთი? კითხვას ვსვამ. შეგიძლიათ ერთი თემა მითხრათ, რომ ჩვენი გუნდის წევრმა თქვა, რომ ამერიკას ომი უნდა?! ერთი მითხარით, ვინ თქვა?_ განაცხადა ზარქუამ.
