პარლამენტმა „უცხოური გავლენის გამჭვირვალობის შესახებ" კანონპროექტი მეორე მოსმენით ჩააგდო. კანონპროექტის წინააღმდეგ ხმა 35 დეპუტატმა მისცა ხმა, ხოლო 1-მა მხარი დაუჭირა.
„ხალხის ძალის“ მიერ ინიცირებული კანონის პროექტი კენჭისყრაზე განხილვის გარეშე დააყენეს.
პარლამენტმა კანონპროექტი „უცხოური გავლენის გამჭვირვალობის შესახებ“ პირველი მოსმენით 7 მარტს მიიღო. მასშტაბური საპროტესტო აქციების შემდეგ უმრავლესობამ მიიღო გადაწყვეტილება კანონპროექტი მეორე მოსმენით ჩაეგდო, ხოლო მეორე კანონპროექტი „უცხოური აგენტების რეგისტრაციის შესახებ“ გაეწვია. პარლამენტმა ვენეციის კომისიიდან ორივე დოკუმენტი გამოითხოვა.
უცხოელი აგენტების რეგისტრაციის შესახებ“ კანონპროექტით, უცხოეთის აგენტად რეგისტრაციის ვალდებულება ნებისმიერ ფიზიკურ და იურიდიულ პირს უნდა ჰქონოდა, რომელიც დაფინანსებას უცხოეთიდან იღებს.
„უცხოელი აგენტების რეგისტრაციის შესახებ“ კანონით გათვალისწინებული ვალდებულების შეუსრულებლობა ან არაჯეროვნად შესრულება გამოიწვევდა სისხლის სამართლის პასუხისმგებლობას და იქნებოდა დასჯადი ჯარიმით ან თავისუფლების აღკვეთით - 5 წლამდე ვადით.
პროექტის თანახმად, სუბიექტები, რომლებიც კანონპროექტით დადგენილ უცხოური ძალის აგენტის კრიტერიუმებს აკმაყოფილებენ, ვალდებული ხდებოდნენ, გენერალური პროკურორისთვის მიემართათ და უცხოური ძალის აგენტად დარეგისტრირება მოეთხოვათ.
აღნიშნული კანონის მოქმედება არ ვრცელდებოდა დიპლომატებზე, კონსულებზე და დიპლომატიური სამსახურისა და საკონსულო დაწესებულების თანამშრომლებზე. კანონი ასევე არ ეხებოდა უცხო ქვეყნის თანამდებობის პირებს, პირს, რომელიც საქველმოქმედო საქმიანობას ეწევა და პირს, „რომელიც რელიგიურ, საგანმანათლებლო, მეცნიერულ, აკადემიურ ან სახელოვნებო საქმიანობას კეთილსინდისიერად ეწევა“.
