მინდა გამოვეხმაურო ზოგიერთების განცხადებას, ,,ქართული ოცნება“ იშლებაო. გულისხმობენ რამდენიმე დეპუტატის მიერ მანდატის დატოვების სურვილს. ვისაც ეს ქართული ოცნების დაშლა ჰგონია, მინდა მოკლედ ვუპასუხო, მანამ არაფერი არ გეტკინოთ. ამ სიტყვებით პლენარულ სხდომაზე ფრაქცია ,,ქართული ოცნების“ თავმჯდომარის მოადგილემ, რიმა ბერაძემ ოპოზიციას მიმართა.
მან გამჭვირვალობის შესახებ კანონის წინააღმდეგ გამართულ აქციებს უნიჭოდ დაგეგმილი დესტაბილიზაციის მცდელობა უწოდა და აღნიშნა, რომ ოპოზიცია ამ თემით სპეკულირებს და მას საზოგადოების ორად გახლეჩის საშუალებად იყენებს.
,,გამჭვირვალობის შესახებ კანონის თემით სპეკულირებას არ წყვეტთ და მას საზოგადოების ორად გახლეჩის საშუალებად იყენებთ. კანონად არ ქცეული პროექტი რუსულად გამოაცხადეთ და ახალგაზრდების დიდი ნაწილის თქვენი მიზნებისთვის გამოყენება სცადეთ. რეალურად, ამ კანონის მიზანი საზოგადოების ინფორმირებულობა და კონკრეტული სექტორის მხრიდან, ფინანსური გამჭვირვალობის ზრდა იყო, რაც არათუ ეწინააღმდეგება ჩვენი ქვეყნის დემოკრატიზაციას, არამედ აუცილებელიც კი არის მისი განვითარებისთვის. თქვენს მიერ უნიჭოდ დაგეგმილმა დესტაბილიზაციის მცდელობამ დააზარალა სახელმწიფო ინტერესები და საზოგადოების გახლეჩა გამოიწვია.
ძალიან სამწუხაროა, მაგრამ ვიხილეთ კლასიკური ორმაგი სტანდარტი დასავლეთის მხრიდან, ჩვენთვის ეს კანონი კარგია, მაგრამ თქვენთვის ცუდი იქნებაო. ამაზე საერთოდ რა კომენტარი უნდა გავაკეთო, არ ვიცი. ნელა-ნელა ყველა გააცნობიერებს, რომ ე.წ. რუსულ კანონში არაფერი არ იყო რუსული, რომ ასეთი კანონი მოქმედებს საკმაოდ ბევრ ქვეყანაში ამრიკიდან ავსტრალიამდე, მაგრამ არსად ამ კანონს რუსულს არ უწოდებენ“ _ განაცხადა რიმა ბერაძემ.
