პარლამენტის თავმჯდომარე არჩილ თალაკვაძე Twitter-ზე შარლ მიშელის პირადი წარმომადგენლის, კრისტიან დანიელსონის, მედიაციით მმართველ გუნდსა და ოპოზიციას შორის გამართულ მოლაპარაკებების პროცესს გამოეხმაურა და წერს, რომ შეთანხმების დოკუმენტზე ხელის მოსაწერად ოპოზიცია მზად არ იყო.
"მადლობა ევროპული საბჭოს პრეზიდენტს შარლ მიშელს და მის პირად წარმომადგენელს კრისტიან დანიელსონს მედიაციისთვის. მიუხედავად იმისა, რომ ოპოზიცია არ იყო მზად ხელი მოეწერა დოკუმენტზე, ჩვენ დანიელსონის წინადადებებით ვიხელმძღვანელებთ სასამართლო და საარჩევნო რეფორმების განხორციელებისას. ჩვენ ღიას ვტოვებთ კარს პარტიებისთვის, რომ შემოგვიერთდნენ" - წერს თალაკვაძე.
მედიაციის მეორე რაუნდი გუშინ რამდენიმე საათის განმავლობაში გრძელდებოდა და უშედეგოდ დასრულდა. მხარეებმა კრისტიან დანიელსონის მიერ შეთავაზებულ დოკუმენტს ხელი არ მოაწერეს. დანიელსონმა საქართველო უკვე დატოვა, მოლაპარაკებებთან დაკავშირებით ინფორმაციას ის შარლ მიშელს მიაწვდის.
მთავარი ფოტო: Facebook
