აშშ-ის რომელიმე წარმომადგენელზე ხელისუფლების მხრიდან არასდროს ყოფილა თავდასხმა. ამის შესახებ პარლამენტის ვიცე-სპიკერმა, ,,ქართული ოცნების“ წარმომადგენელმა არჩილ თალაკვაძემ განაცხადა. მისივე თქმით, თავდასხმები და შეურაცხყოფა რადიკალური ოპოზიციის მხრიდან იყო.
როგორც თალაკვაძემ აღნიშნა, ოპოზიცია ცდილობს, მმართველ გუნდს გადააბრალონ ის, რასაც თავად აკეთებენ.
,,ამერიკის ხელისუფლებაზე ან მის რომელიმე წარმომადგენელზე საქართველოს ხელისუფლების რომელიმე ოფიციალური წარმომადგენლის მხრიდან არასდროს ყოფილა არანაირი თავდასხმა და ასეთი, რა თქმა უნდა, გამორიცხულია მომავალშიც. ამერიკის შეერთებული შტატები არის საქართველოს ნომერ პირველი სტრატეგიული პარტნიორი, ჩვენ ათწლეულების განმავლობაში გვაქვს ძალიან მჭიდრო თანამშრომლობა და ურთიერთობები. რა თქმა უნდა, ეს ჩვენთვის არის ძალიან ფასეული. თუ ჩვენ თავდასხმები და შეურაცხყოფები ვნახეთ, ეს იყო რადიკალური ოპოზიციის მხრიდან. ამას არაერთი შეფასება მოჰყვა და ყველას გვახსოვს, „ნაციონალური მოძრაობის“ წარმომადგენლები თუ რა შეფასებებს აკეთებდნენ დასავლეთის ელჩების მიმართ ამ წლების განმავლობაშიც, წარსულშიც და საერთოდ, ვხედავთ, რომ რადიკალური ოპოზიცია ცდილობს, რასაც აკეთებენ თვითონ, ის გადააბრალონ მმართველ პარტიას“ _ განაცხადა არჩილ თალაკვაძემ.
შეგახსენებთ, სახელმწიფო დეპარტამენტში გამართულ ბრიფინგზე, ნედ პრაისი საქართველოში აშშ-ის ელჩის, კელი დეგნანის მიმართ ,,ქართული ოცნების" ბოლოდროინდელ რიტორიკას გამოეხმაურა და თქვა, რომ დეზინფორმაცია და ელჩ დეგნანზე პერსონალური თავდასხმები არ შეესაბამება პარტნიორების მუშაობას. როგორც მან ასევე აღნიშნა, საქართველოს ხელისუფლების ზოგიერთი წარმომადგენელი ცდილობს, მოსახლეობას ევროინტეგრაციისკენ სწრაფვაში ხელი შეუშალოს.
