"სტრატეგია აღმაშენებლის" ლიდერი, გიორგი ვაშაძე ცენტრალური საარჩევნო კომისიის თავმჯდომარის, თამარ ჟვანიას გადადგომის ფაქტს ეხმაურება და აღნიშნავს, რომ მისი თანამდებობის დატოვება რეფორმათა განხორციელების მხოლოდ პირველი ნაბიჯია და ის დოკუმენტის კონკრეტულ შედეგს წარმოადგენს.
ვაშაძის თქმით, ამის შემდეგ, ყველაზე მნიშვნელოვანი ეტაპი ოქტომბრის თვითმმართველობის არჩევნებზე და რეფერენდუმზე დანერგილი პროცედურული და ტექნოლოგიური ცვლილებები იქნება.
"ის, რომ თამარ ჟვანია გადადგა, ეს მხოლოდ პირველი ნაბიჯია, ახლა მნიშვნელოვანია ყველა რეფორმის იმპლემენტაცია. განსაკუთრებით, ტექნოლოგიების ინტეგრაცია საარჩევნო კუთხით, რომ საქართველოს მოქალაქეებს ნდობა გაუჩნდეთ არჩევნებთან მიმართებით. თამარ ჟვანიას გადადგომის შემდეგ ყველაზე მნიშვნელოვანია ოქტომბრის თვითმმართველობის არჩევნებზე და რეფერენდუმის დროს დაინერგოს საარჩევნო პროცედურული და ტექნოლოგიური ცვლილებები.
სპეკულაციები, რომლებიც აქამდე იყო - რისთვის მოაწერეთ ხელი შარლ მიშელის დოკუმენტს და რა მოგვიტანა დოკუმენტმა, ჩვენ ვხედავთ კონკრეტულ შედეგებს და ნაბიჯ-ნაბიჯ მივდივართ აქეთკენ.
ერთი თვის წინ, როდესაც საქართველოს მოქალაქეებს ვეუბნებოდი, რომ გადადგებოდა თამარ ჟვანია, ალბათ, აბსოლუტურ უმრავლესობას არ სჯეროდა. დღეს ეს კონკრეტული გზავნილი, ეს კონკრეტული ნაბიჯი გადადგმულია. ეს დიდი გამარჯვებაა, მაგრამ არ ნიშნავს, რომ უნდა მოვდუნდეთ" - განაცხადა ვაშაძემ.
ფოტო: facebook
