ბატონი ვაშაძე დიდი ხანია, არ დადის პარლამენტში - ვისაც არ უნდა მუშაობა, მოვუწოდებ, რომ დროზე დატოვონ პარლამენტი. ამის შესახებ ,,მოქალაქეების ლიდერმა ლევან იოსელიანმა განაცხადა, რითიც იგი ,,სტრატეგია აღმაშენებლის“ ლიდერის, გიორგი ვაშაძის განცხადებას გამოეხმაურა.
იოსელიანის თქმით, ვაშაძის ამ გადაწყვეტილებას ის მხოლოდ მიესალმება.
,,ბატონი ვაშაძე დიდი ხანია, არ დადის პარლამენტში. შესაბამისად, თუ ის შინაგანადაც და ყველანაირადაც, როგორც მან თქვა, დატოვებს პარლამენტს, ამას მხოლოდ მივესალმები, რადგან ვინც არ დადის პარლამენტში და არ მუშაობს, მიმაჩნია, რომ არც უნდა იღებდეს იმ ხელფასს და პრივილეგიას, რაც პარლამენტის წევრს გააჩნია. ამიტომ, ვისაც არ უნდა მუშაობა, მოვუწოდებ, რომ დროზე დატოვონ პარლამენტი“ _ აღნიშნა ლევან იოსელიანმა.
,,სტრატეგია აღმაშენებლის“ ლიდერმა გიორგი ვაშაძემ გუშინ განაცხადა, რომ ,,სტრატეგია აღმაშენებელი“ შინაგანად მზად არის დატოვოს პარლამენტი და რომ პარტიაში ამ სცენარს აქტიურად განიხილავენ.
