,,მარტივად ხომ დაგვიღეჭეს და გვითხრეს, რომ ეს პუნქტები შეასრულეთ, სახალხო დამცველზე შეთანხმდითო. ამ პროცესს რომ ფარსს ეძახის ბატონი ვაშაძე, მას არ სურს, რომ საქართველო გახდეს ევროკავშირის წევრი, არ სურს, რომ 12 პუნქტი შევასრულოთ. ამის შესახებ ,,მოქალაქეების“ ლიდერმა ალეკო ელისაშვილმა განაცხადა.

მისი შეფასებით, გიორგი ვაშაძის განცხადება ქვეყნის ევროპული პერსპექტივისთვის დამაზიანებელია.

,,ძალიან სამწუხაროა, რომ ბატონ ვაშაძეს ასეთი უცნაური პოზიცია აქვს. ეს ხომ არ არის ,,ქართულ ოცნებასთან“ რიგითი მოლაპარაკებები, აქ საუბარია იმაზე, საქართველო აიღებს თუ არა ევროკავშირის წევრობის ბილეთს. ერთხელ უკვე გავუშვით შანსი კანდიდატის სტატუსის მიღების, მაგრამ გვითხრეს, რომ თუ ამ 12 პუნქტის შესრულებაზე ერთობლივად იმუშავებთ ხელისუფლება და ოპოზიცია და თუ შეასრულებთ, მაშინ გექნებათ პერსპექტივა მიიღოთ წევრობის კანდიდატობაო. ერთ-ერთი ყველაზე მნიშვნელოვანი მუხლი არის სახალხო დამცველის პოზიციაზე შეჯერებაა, რადგან სახალხო დამცველის კანდიდატის გასაყვენად ვერც ცალკე ოპოზიციას ეყოფა ხმები და ვერც ,,ქართულ ოცნებას“, ამიტომ უნდა შევთანხმდეთ ერთ კანდიდატზე. ამ პროცესს რომ ფარსს ეძახის ბატონი ვაშაძე, ეს ლოგიკურად ნიშნავს, რომ მას არ უნდა საქართველო გახდეს ევროკავშირის წევრი, მას არ უნდა საქართველოს ევროპული არჩევანი. კარგი იქნება, რომ ბატონმა ვაშაძემ ცოტა ამ ქვეყნის მომავალზეც იფიქროს. მარტივად ხომ დაგვიღეჭეს და გვითხრეს, რომ ეს პუნქტები შეასრულეთ, სახალხო დამცველზე შეთანხმდითო, როგორც ჩანს, ბატონ ვაშაძეს არ უნდა, რომ საქართველო გახდეს ევროკავშირის წევრი, არ უნდა, რომ 12 პუნქტი შევასრულოთ. მისი განცხადებები არის პროცესის დამაზიანებელი და ამ ქვეყნის პერსპექტივის დამაზიანებელი და ამას რატომ აკეთებს არ ვიცი, ალბათ ამით სურს აჩვენოს, რომ ყველაზე რადიკალია და ამით ,,ნაციონალური მოძრაობის“ მხარდამჭერების გული მოიგოს“ _ განაცხადა ალეკო ელისაშვილმა.

„სტრატეგია აღმაშენებლის“ ლიდერმა, გიორგი ვაშაძემ ოპოზიციურ პარტიებს მოუწოდა, ,,მგლის თავზე სახარების კითხვას შეეშვან" და სახალხო დამცველის შერჩევის პროცესში მონაწილეობაზე უარი თქვან და დასძინა, რომ ,,სტრატეგია აღმაშენებელი“ არ მიიღებს მონაწილეობას იმ თაღლითურ სქემაში, „რომელსაც „ქართული ოცნება“ აბლაბუდასავით ხლართავს“. როგორც ვაშაძემ აღნიშნა, სახალხო დამცველის შერჩევის კანონპროექტი შექმნილია იმისთვის, რომ „ქართულმა ოცნებამ“ სამოქალაქო სექტორის მიერ წამოწყებული პროცესი ჩაშალოს“.