„ევრო 2020“-ს ჯგუფური ეტაპი, „F” ჯგუფის შეხვედრებით დასრულდა და ყველა მერვედფინალისტი გაირკვა.

უკანასკნელმა ჯგუფმა, „სიკვდილის ჯგუფის“ სტატუსი გაამართლა და მართლაც ყველაზე დაძაბული და საინტერესო შეხვედრები შემოგვთავაზეს გუნდებმა.

ჯგუფის ბოლო შეხვედრებში, საფრანგეთი-პორტუგალიის და გერმანია-უნგრეთის დაპირისპირება ვიხილეთ და მატჩების მიმდინარეობისას რამდენიმეჯერ შეიცვალა ჯგუფში სიტუაცია, ბოლო წუთამდე უცნობი იყო ვინ გავიდოდა შემდეგ ეტაპზე, პორტუგალია, გერმანია თუ უნგრეთი.

საბოლოოდ ორივე შეხვედრა ერთნაირი ანგარიშით, 2-2 დასრულდა და მერვედფინალს მიღმა უნგრეთი დარჩა.

უნგრელები მიუნხენში ორჯერ იგებდნენ შეხვედრას და ძალიან ახლოს იყვნენ დიდი სენსაციის მოხდენასთან, თუმცა გერმანია, ლეონ გორეცკამ გადაარჩინა და 84-ე წუთზე გამთანაბრებელი და 1/8 ფინალში გამსვლელი გოლი გაიტანა.

მეორე შეხვედრაში, ესპანელმა მსაჯმა მატეო ლაოსმა, 3 თერთმეტმეტრიანი დადო, 2 საფრანგეთის კარში, ერთიც პორტუგალიის კარში. დუბლით გამოიჩინეს თავი ყოფილმა თანაგუნდელებმა, ქარიმ ბენზემამ და კრიშტიანო რონალდომ. სკანდალის შემდეგ საფრანგეთის ნაკრებში დაბრუნებული ბენზემასთვის, ეს პირველი გოლები იყო, ხოლო რონალდომ კიდევ ერთი რეკორდი დაამყარა და ერთსაც გაუთანაბრდა. კერძოდ, მსოფლიოს და ევროპის ჩემპიონატებზე გატანილი ჯამური გოლებით, რონალდომ, მიროსლავ კლოზეს გადაასწრო და საუკეთესო მეგოლე გახდა. ამ დუბლით, კრიშტიანო რონალდოს ნაკრებში უკვე 109 გოლი დაუგროვდა და ამ დრომდე რეკორდსმენ, ირანელ ალი დაეის გაუთანაბრდა.

დავუბრუნდეთ 1/8 ფინალებს, რომელიც 26 ივნისს დაიწყება, წყვილები და მათი კალენდარი კი ასეთია:

26 ივნისი:
20:00 საათი: უელსი-დანია
23:00 საათი: იტალია-ავსტრია

27 ივნისი:
20:00 საათი: ნიდერლანდები-ჩეხეთი
23:00 საათი: ბელგია-პორტუგალია

28 ივნისი:
20:00 საათი: ხორვატია-ესპანეთი
23:00 საათი: საფრანგეთი-შვეიცარია

29 ივნისი:
20:00 საათი: ინგლისი-გერმანია
23:00 საათი: შვედეთი-უკრაინა