დასრულდა „ევრო 2020“ და დასრულდა იტალიის ტრიუმფით. „სკუადრა აძურამ“ ინგლისი დაამარცხა თერთმეტმეტრიანების სერიაში და ისტორიაში მეორედ გახდა ევროპის ჩემპიონი, რაც შეეხება ინგლისს, ჯერ მხოლოდ პირველ ფინალს დასჯერდება კონტინენტის პირველობაზე.

მოგეხსენებათ ფინალი ინგლისში, „უემბლის“ სტადიონზე ჩატარდა, შესაბამისად ინგლისს გულშემატკივრის დიდი მხარდაჭერაც ჰქონდა და კარგადაც დაიწყეს. უკვე მეორე წუთზე, ტრიპიერის ჩამოწოდებული, შოუმ ერთი შეხებით გადაგზავნა დონარუმას კარში, თუმცა შემდეგ მოხდა ის, რაც ბოლო დროს ხშირად ხდება 2 ძლიერი გუნდის დაპირისპირებისას, ინგლისმა მეორე ნომრად, ანგარიშის შენარჩუნებაზე დაიწყო თამაში და 67-ე წუთზე დაისაჯნენ კიდეც, იტალიელთა ცენტრალურმა მცველმა ბონუჩიმ გაათანაბრა და საბოლოოდ მატჩი თერთმეტმეტრიანების სერიამდე მივიდა. იტალიელთა კიპერი, ჯანლუიჯი დონარუმა, როგორც ნახევარფინალში, ფინალშიც მოწოდების სიმაღლეზე აღმოჩნდა და საბოლოოდ მანჩინის შეგირდები ჩემპიონები გახდნენ. ჩემპიონატის საუკეთესო მოთამაშე კი, ნახევარფინალის და ფინალის გმირი, ჯანლუიჯი დონარუმა გახდა.

ბედის ირონიაა, რომ ინგლისელთა მწვრთნელმა, გარეთ საუდგეიტმა, შეცვლაზე შემოსულულ სამ ფეხბურთელს, საკას, რაშფორდს და სანჩოს (აქედან უკანასკნელი ორი სპეციალურად პენალტებისს სერიისთვის შემოიყვანა) დაარტყმევინა თერთმეტმეტრიანი და სწორედ ამ სამმა გააფუჭა და ნანატრ ტიტულს დაემშვიდობნენ. საუთგეიტს თერთმეტმეტრიანების წყევლა არ შორდება, 1996 წლის ევროპის ჩემპიონატზე, ასევე ინგლისში, სწორედ საუთგეიტმა ააცილა თერთმეტმეტრიანი და ფინალში გერმანია გავიდა.

ასეა თუ ისე, ევროპას დამსახურებული ჩემპიონი ჰყავს, დაწყებული პირველი მატჩიდან, დამთავრებული უკანასკნელ დაპირისპირებამდე, იტალიამ იბრძოლა, ლამაზი ფეხბურთიც გვაჩვენა და ღირსეულად გაიმარჯვა.