ევროპის ჩემპიონატის უკანასკნელ 1/8 ფინალში, უკრაინა-შვედეთის დაპირისპირება შედგა.

როგორც მოგეხსენებათ, შვედეთი ჯგუფიდან პირველი ადგილით გავიდა, უკრაინა კი ერთადერთი ნაკრებია ვინც 3 ქულა აიღო და ასე მოხვდა მერვედფინალში. შესაბამისად ფავორიტად შვედეთი ითვლებოდა, თუმცა შეხვედრა უკრაინელთა უპირატესობით დაიწყო და 27-ე წუთზე, მანჩესტერ სიტის ფეხბურთელმა, ზინჩენკომ, უკრაინა დააწინაურა. გაშვებული გოლის შემდეგ შვედეთმა მოუმატა და პირველივე ტაიმში მოახერხა გათანაბრება, გატანა შვედეთის მხრიდან ისევ ფორსბერგმა მოახერხა, რომლისთვისაც ეს მე-4 გოლი იყო მიმდინარე „ევრო 2020“-ზე. მეორე ტაიმი ფრთხილი და თანაბარი გამოდგა და გოლი აღარ გასულა, შეხვედრამ დამატებით ტაიმებში გადაინაცვლა. 98-ე წუთზე, შვედმა დანიელსონმა, ბესედინის წინააღმდეგ ძალიან იუხეშა და სერიოზული ტრავმა მიაყენა, თავად კი წითელი ბარათი დაიმსახურა და შვედეთი 10 კაცით დარჩა. უკრაინელთა მწვრთნელმა, ანდრეი შევჩენკომ, კიდევ ორი ცვლილება განახორციელა და შეტევა გააძლიერა, მიზანი იყო საქმე თერთმეტმეტრიანებამდე არ მიეყვანათ და გოლი გაეტანათ. შვედეთი მთელი ძალებით საკუთარ მოედანზე დადგა და უკრაინა მხოლოდ ჩაწოდებებს ახერხებდა უშედეგოდ, თუმცა ჯიუტმა მცდელობებმა შედეგი მეორე დამატებითი ტაიმის ბოლო წუთზე გამოიღო. ზინჩენკომ მორიგი ჩაწოდება განახორციელა ფლანგიდან, რომელიც ზუსტი თავური დარტყმით, შეცვლაზე შემოსულმა დოვბიკმა გადაგზავნა შვედების კარში და უკრაინა 1/4 დინალში გავიდა.

მატჩის შემდეგ ტვიტერზე პოსტი უკრაინის პრეზიდენტმა გამოაქვეყნა.

დიახ, ეს გამარჯვებაა! ჩვენ „ევრო 2020“-ს 1/4-ფინალში ვართ! წარმოუდგენელი დაძაბულობა, უგონო ჩეხვა დამატებით დროში და კვანძის ფეერიული გახსნა 121-ე წუთზე, ეს არარეალურად მაგარი იყო! ბიჭებს, რესპექტი - თქვენ ნამდვილი მებრძოლები ხართ! ბესედინს ჯანმრთელობა. დიდება უკრაინას! - დაწერა ზელენსკიმ.

ამრიგად ყველა ერთი მეოთხედფინალური წყვილი და მათი მატჩების თარიღი და დრო ცნობილია.

2 ივლისი:
20:00 საათი: შვეიცარია-ესპანეთი
23:00 საათი: ბელგია-იტალია

3 ივლისი:
20:00 საათი: ჩეხეთი-დანია
23:00 საათი: უკრაინა-ინგლისი