„ევრო 2020“-ზე, 20 ივნისს, ჯგუფური ეტაპის ბოლო, ყველაზე დაძაბული და საინტერესო ტური დაიწყო, რომელიც საბოლოოდ გამოავლენს 16 მერვედფინალისტს.

დღეს „A” ჯგუფის შეხვედრები გაიმართა, სადაც იტალია-უელსს, ხოლო შვეიცარია-თურქეთს დაუპირისპირდა.

როგორც მოგეხსენებათ, იტალიის ნაკრებს საუცხოო ორი ტურის შემდეგ, განაღდებული ჰქონდა ევროპის ჩემპიონატის მერვედფინალი და მანჩინიმ, სასტარტო შემადგენლობის 8 ფეხბურთელი დაასვენა უელსის წინააღმდეგ. მიუხედავად გადახალისებული შემადგენლობისა, იტალიამ მაინც სრული დომინაცია აჩვენა და მატეო პესინას ერთადერთი გოლით გაიმარჯვა. შედეგად სკუადრააძურამ 3 თამაშში მაქსიმალური, 9 ქულა აიღო, თან ისე, რომ ბურთი არ გაუშვია და მიუხედავად დარჩენილი 5 ჯგუფის შეხვედრებისა, უკვე შეგვიძლია ვთქვათ, რომ იტალიამ ჯგუფურ ეტაპზე ყველზე კარგი ფეხბურთი ითამაშა. ისიც უნდა აღინიშნოს, რომ იტალიამ ზედიზედ მშრალად მოგებული მატჩების სერია, 11-მდე გაზარდა, რაც ფენომენალური შედეგია.

უნდა შევაქოთ უელსიც, რომლისთვისაც ბევრი ბურთის გაშვება, მეორე ადგილის დაკარგვას ნიშნავდა და 55 წუთზე ამპადუს მიერ მიღებული წითელი ბარათის მიუხედავად, დრაკონებმა გაძლეს და 1 გოლზე მეტი არ გაუშვეს.

მეორე შეხვედრაში, თურქეთის უსუსური გამოსვლა მიმდინარე ევროპის ჩემპიონატზე, შვეიცარიამაც დაადასტურა და დამაჯერებლად მოუგო შენოლ გიუნეშის გუნდს. ანგარიში მე-6 წუთზე სეფეროვიჩმა გახსნა, რასაც 20 წუთში ჩაქირის გოლი მოჰყვა და ტაიმი 2-0 დასრულდა. მეორე შეხვედრაში იტალიის მინიმალური უპირატესობის ფონზე, შვეიცარიას კიდევ 2 ბურთი ესაჭიროებოდა რათა უელსზე უკეთესი ბურთების სხვაობით მე-2 ადგილზე გასულიყო, თუმცა მეორე ტაიმში თავად გაუშვეს. თურქეთის ნაკრების ერთადერთი გოლი ევროპის ჩემპიონატზე, კაჰვეჩიმ გაიტანა 62-ე წუთზე. ზუსტად 6 წუთში ჩაქირიმ დუბლი შეასრულა და შვეიცარია ისევ ორი ბურთით, 3-1 დააწინაურა. იმედი ჩაისახა, შვეიცარია ეცადა კიდევ გატანას, მაგრამ აღარ გამოუვიდა და მე-2 აგილზე უელსი გავიდა.

მოგეხსენებათ, 6 ჯგუფიდან, 4 საუკეთესო მე-3 ადგილოსანიც გადის მერვედფინალში და თუ სასწაული არ მოხდა, შვეიცარია 4 ქულით საუკეთესო ოთხეულში წესით უნდა მოხვდეს. გახსოვთ ალბათ, რომ მოქმედი ჩემპიონი პორტუგალია, სწორედ საუკეთესო მესამე ადგილით გავიდა ჯგუფიდან და შემდეგ ჩემპიონი გახდა, თან პორტუგალიამ „ევრო 2016“-ის ჯგუფში მხოლოდ 3 ქულა დააგროვა.

ხვალ, 21 ივნისს, კიდევ 2 ჯგუფის უკანასკნელი შეხვედრები გაიმართება.

„B” ჯგუფში, ფინეთი-ბელგიას, ხოლო რუსეთი-დანიას დაუპირისპირდება. ბელგიის ნაკრებს 6 ქულა აქვს და განაღდებული აქვს მერვედფინალის საგზური, რუსეთს და ფინეთს 3-3 ქულა აქვთ, დანიას 0, თუმცა, ამ სამეულიდან ყველა გუნდს აქვს მე-2 ადგილზე გასვლის შანსი. ეს შეხვედრები პარალელურად, 23:00 საათზე გაიმართება.

რაც შეეხება „C” ჯგუფს, აქ, უკვე გასული ნიდერლანდების ნაკრები, უკვე გავარდნილ ჩრდილოეთ მაკედონიას დაუპირისპირდება, ხოლო უკრაინის ნაკრები, ავსტრიას შეერკინება მე-2 ადგილისთვის ბრძოლაში. შეგახსენებთ ორივე გუნდს 3-3 ქულა აქვს, თუმცა ბურთების სხვაობით უკრაინა ფლობს უპირატესობას და შესაბამისად ფრეც შევჩენკოს შეგირდებს აწყობს აწყობს. „C” ჯგუფის შეხვედრები 20:00 საათზე დაიწყება.