მიმდინარე ევროპის ჩემპიონატზე უკვე ყველა ნაკრებმა ითამაშა და ყველამ ასე თუ ისე დაგვიტოვა შთაბეჭდილება რა ძალას წარმოადგენს.

16 ივნისს, ჯგუფური ეტაპის მეორე ტური დაიწყო. პირველი დაპირისპირება რუსეთსა და ფინეთს შორის შედგა. მიუხედავად იმისა, რომ მომენტები ორივე გუნდს ჰქონდა და მიუხედავად იმისა, რომ ფინეთმა მე-3 წუთზე გაიტანა გოლი, რომელიც მილიმეტრებით იყო თამაშგარე მდგომარეობაში და არ ჩაითვალა, მცირე უპირატესობა მაინც რუსეთს ჰქონდა და პირველ ტაიმში, მსაჯის მიერ კომპენსირებულ დროში, მირანჩუკის მიერ გატანილი გოლით რუსეთმა 1-0 მოიგო. ამრიგად რუსეთსაც და ფინეთსაც 3-3 ქულა აქვთ, ჯგუფის მეორე მატჩი ბელგიასა და დანიას შორის, დღეს გაიართება 20:00 საათზე.

მეორე ტურის მეორე შეხვედრას აზერბაიჯანის დედაქალაქმა ბაქომ უმასპინძლა, სადაც თურქეთი-უელსის დაპირისპირება შედგა. შეხვედრას თურქეთის და აზერბაიჯანის პრეზიდენტები დაესწრნენ. გასაგები მიზეზების გამო თურქეთი ფაქტიურად საკუთარ კედლებში თამაშობდა და იტალიასთან განადგურების შემდეგ, თავისი სიტყვა უნდა ეთქვა, თუმცა ეს არ გამოვიდა. შეხვედრა საკმაოდ სანახაობრივი იყო და ორივე ნაკრებმა ბევრჯერ დაარტყა კარში, გოლები კი მხოლოდ ერთმა გუნდმა გაიტანა. პირველი ტაიმის მიწურულს, გარეთ ბეილმა ჯერ რემზის გაუკეთა საგოლე გადაცემა, შემდეგ კი მეორე ტაიმის დამატებულ დროში გაატანინა რობერტსს და მატჩის საუკეთესო მოთამაშეც გახდა, მიუხედავად იმისა, რომ 61-ე წუთზე თერთმეტმეტრიანი დარტყმა საშინლად შეასრულა. უელსმა საბოლოოდ 2-0 გაიმარჯვა და 4 ქულით მეორე ადგილზეა.

რაც შეეხება დღის ბოლო მატჩს, იტალიამ პირველი თამაშის მსგავსი შეხვედრა ჩაატარა, ისევ სანახაობრივი და ისევ 3-0 გაიმარჯვა, ამჯერად შვეიცარიასთან. „სკუადრა აძურას“ რიგებში დუბლი შეასრულა ლოკატელიმ, უკანასკნელი გოლი კი ჩირო იმობილემ გაიტანა. იტალიამ ამ გამარჯვებით 6 ქულა დააგროვა და უკვე გაინაღდა ჯგუფიდან გასვლა.

არ შეგვიძლია არ შევეხოთ იტალიელთა წარმოუდგენელ სტატისტიკას. მანჩინის შეგირდებმა, ბოლო 10 ჩატარებული მატჩიდან ათივე მოიგეს, თან ყველა მინიმუმ ორ ბურთიანი სხვაობით და არცერთ შეხვედრაში გოლი არ გაუშვიათ. ეს მართლაც საოცრებაა.

ბოლოს იტალიას ნიდერლანდებმა გაუტანა 2020 წლის 14 ოქტომბერს და ის მატჩი 1-1 დასრულდა. წაგებით კი იტალია ბოლოს 2018 წლის 10 სექტემბერს დამარცხდა „ერთა ლიგაზე“ პორტუგალიასთან, ანგარიშით 1-0.

რაც შეეხება დღევანდელ შეხვედრებს, ბელგია-დანიას გარდა, 17:00 საათზე უკრაინა-ჩრდილოეთ მაკედონიის მატჩი გველის, ხოლო 23:00 საათზე, ნიდერლანდები ამსტერდამში ავსტრიას უმასპინძლებენ.