14 ივნისს, ევროპის ჩემპიონატზე, რომელიც ისტორიაში პირველად, ერთდროულად რამდენიმე ქალაქში ტარდება, “D” და „E” ჯგუფის შეხვედრები გაიმართა, სადაც წარმატებით იასპარეზა ჩეხეთმა და სლოვაკეთმა. როგორც იცით ეს ქვეყნები 1993 წლამდე ერთ ქვეყანას, „ჩეხოსლოვაკიას“ წარმოადგენდა.

მოგეხსენებათ „D” ჯგუფის პირველი შეხვედრა, ინგლისსა და ხორვატიას შორის, გუშინ გაიმართა და ბრიტანელთა გამარჯვებით, 1-0 დასრულდა. მეორე შეხვედრა კი დღეს გლაზგოში ჩატარდა, შოტლანდიასა და ჩეხეთს შორის, რომელიც ლევერკუზენის ბაიერნის თავდამსხმელის, პატრიკ შიკის დუბლით ჩეხეთმა მოიგო 0-2. განსაკუთრებით ლამაზი მეორე გოლი გამოვიდა, რომელიც ჩეხების შემტევმა ცენტრიდან გადაგზავნა მეტოქის კარში.

პატრიკ შიკი ამ ორი გოლით ბომბარდირთა დავას ჩაუდგა სათავეში, რა თქმა უნდა რომელუ ლუკაკუსთან ერთად, რომელმაც რუსეთს შეუსრულა დუბლი.

დღის მეორე შეხვედრა 20:00 საათზე დაიწყო, სადაც „E” ჯგუფის გუნდები, პოლონეთი და სლოვაკეთი დაუპირისპირდნენ ერთმანეთს. რობერტ ლევანდოვსკის ფენომენალური სეზონიდან გამომდინარე, წყვილის ფავორიტად პოლონეთი მიიჩნეოდა, თუმცა სლოვაკეთმა პატარა სენსაცია შემოგვთავაზა და 1-2 გაიმარჯვა. ამ შეხვედრაშივე ვიხილეთ „ევრო 2020“ ის პირველი გაძევება. შეხვედრის რუმინელმა მთავარმა მსაჯმა, ჰატეგანმა, პოლონელ ფეხბურთელს, გრეგორ კრიხოვიაკს, ჯერ 22-ე, შემდეგ კი 62-ე წუთზე უჩვენა ყვითელი ბარათი და მოედანი დაატოვებინა.

ამრიგად ევროპის ჩემპიონატის პირველი ტურის დასრულებამდე 3 შეხვედრაა დარჩენილი, „E” ჯგუფის მეორე შეხვედრა, ესპანეთსა და შვედეთს შორის რამდენიმე წუთში, 23:00 საათზე დაიწყება სევილიაში, ხოლო “G” ჯგუფის 2 მატჩი ხვალ, 15 ივნისს გაიმართება. 20:00 საათზე, უნგრეთი-პორტუგალია ბუდაპეშტში, ხოლო 23:00 საათზე, გერმანია-საფრანგეთი მიუნხენში ჩატარდება.