თუ ვინმეს ტონი და საუბრის შინაარსი აქვს გასაფილტრი, ეს პირველ რიგში პოდოლიაკია. ასე გამოეხმაურა ადამიანის უფლებათა კომიტეტის თავმჯდომარე მიხეილ სარჯველაძე უკრაინის პრეზიდენტის მრჩევლის მიხაილო პოდოლიაკის განცხადებას, რომელმაც ,,მთავარ არხთან“ ინტერვიუში თქვა, რომ საქართველოში თანამდებობის პირებმა ტონი უნდა შეცვალონ და თუ გარკვეული მიზეზების გამო ეს არ შეუძლიათ, მაშინ საჯარო გამოსვლები, რომელიც უკრაინას ეხება, შეამცირონ. 

სარჯველაძის თქმით, უკრაინის პრეზიდენტის მრჩეველი თავს ესხმის საქართველოს ხელისუფლებას, პასუხის მიღების შემდეგ კი აკრიტიკებს მათ.

,,თავს გვესმის, უმძიმეს ბრალდებებს გვიყენებს და როდესაც მკაცრ პასუხს მიიღებს, შემდეგ გვაკრიტიკებს. არავის, მათ შორის არც ომში მყოფი ქვეყნის ხელისუფლების მაღალჩინოსანს არ აქვს უფლება, ასე დაუსაბუთებლად ბრალდებები წამოაყენოს, თუ ვინმეს ტონი და საუბრის შინაარსი აქვს გასაფილტრი, ეს პირველ რიგში, პოდოლიაკია, რომელიც სინამდვილესთან შეუსაბამო განცხადებებს აკეთებს. სანქციების დაწესების სურვილი ალაპარაკებს ტყუილებს ბატონ პოდოლიაკს. პოდოლიაკის მთელი ეს განცხადებები, რომელიც უკავშირდებოდა სანქციებს, ცრუ ბრალდებებს, რეალურად როგორც ჩანს, მოტივირებილია სააკაშვილის გულშემატკივრობით. სასჯელი აქვს დაკისრებული ბატონ სააკაშვილს. მკურნალობის საკითხს რაც შეეხება, თუკი ვინმე იტყვის, რომ მკურნალობის ისეთი სერვისი სჭირდება, რომლის მიწოდებაც საქართველოში შეუძლებელია, მხოლოდ ამ შემთხვევაში შეიძლება დაისვას საკითხი უცხოეთში წაყვანასთან დაკავშირებით“ _ განაცხადა სარჯველაზემ.

ცნობისთვის, მიხაილო პოდოლიაკმა ასევე განაცხადა, რომ ისინი, ვინც უკრაინაში მიმდინარე გენოციდს ამართლებენ, თავად გასამართლდებიან საერთაშორისო საზოგადოების მხრიდან.

მისივე თქმით, ქვეყნისთვის, რომელიც საკუთარ მომავალზე ფიქრობს, მიხეილ სააკაშვილის დონის ფიგურის ციხეში ყოფნა მართებული არ არის  და თუ ხელისუფლებას არ სურს ის უკრაინას გადასცეს, მაშინ შეუძლიათ ის სხვა ქვეყანას გადასცენ.