ის პროცესები, რომლებიც 5 ივლისს ჩადენილი დანაშაულების საპასუხოდ განხორციელდა, ახლოსაც ვერ მივა იმასთან, რაც არის სავალდებულო ამ ქვეყნის კონსტიტუციით. მეტსაც გეტყვით, მთავარი წამქეზებელი დღესაც რჩება პრემიერ-მინისტრად. ამის შესახებ პარტია ,,ლელოს“ ლიდერმა ანა ნაცვლიშვილმა განაცხადა.

დეპუტატის განცხადებით, 5 ივლისის მოვლენებთან დაკავშირებით მართლმსაჯულება მხოლოდ შაბლონურად ხორციელდება. მისივე თქმით, ეს წინასწარ დაგეგმილი და ორგანიზებული დანაშაულია, რომელსაც თანამდებობის პირებთან პირდაპირი ბმა აქვს.

,,5 ივლისი საქართველოს უახლოეს ისტორიაში გამორჩეულად სამარცხვინო დღეა და ეს ლაქა არ არის ჩამორეცხილი მართლმსაჯულების განხორციელებით. ის პროცესები, რომლებიც 5 ივლისს ჩადენილი დანაშაულების საპასუხოდ განხორციელდა, ახლოსაც ვერ მივა იმასთან, რაც არის სავალდებულო ამ ქვეყნის კონსტიტუციით. მეტსაც გეტყვით, მთავარი წამქეზებელი დღესაც რჩება პრემიერ-მინისტრად. ჩემი ინფორმაციით, ეს საქმე არის გასაჩივრებული სტრასბურგის სასამართლოში და ნიშანდობლივია, რომ ადამიანის უფლებათა ევროპული სასამართლო სვამს კითხვას, სახელმწიფოს წინაშე წაახალისა თუ არა უმაღლესი თანამდებობის პირების, მათ შორის პრემიერის მხრიდან გაკეთებულმა ღია მოწოდებებმა დილით, რამდენიმე საათის დატრიალებული ძალადობა რუსთაველზე. ამ კითხვის დასმა სასამართლოს მხრიდან იმაზე მიუთითებს, რომ ხელისუფლების უმაღლესი თანამდებობის პირების ჩართულობის გარეშე ამ მასშტაბის ძალადობა ვერ განხორციელდებოდა. დღემდე მართლმსაჯულება რომ მხოლოდ შაბლონურად ხორციელდება, რომ სათქმელი ჰქონდეთ, აი, დავაკავეთ ადამიანები და არ ხორციელდება იმისთვის, რომ გამოიკვეთოს ამ უმძიმესი დანაშაულის წინასწარ დაგეგმილი და ორგანიზებული სახე, რომელსაც პირდაპირი ბმა აქვს თანამდებობის პირებთან“ _ აცხადებს ანა ნაცვლიშვილი.