ჰუმანიტარულ დახმარებას ამდენი პიარი არ სჭირდება. პარლამენტს არაფერი რომ არ გაუკეთებია უკრაინის დასახმარებლად, ამას ეს უსუსტესი გზავნილები ვერ გადაფარავს. ამის შესახებ „ლელოს“ დეპუტატმა, ანა ნაცვლიშვილმა განაცხადა. მისი თქმით, შლვა პაპუაშვილისგან პარლამენტმა დღეს ვერ მოისმინა, რომ საქართველოს სახელმწიფო ცივილიზებულ სამყაროსთან დგომას ცალსახად და არაორაზროვნად აფიქსირებს.
,,ჩვენ ტრიბუნასთან პარლამენტის სპიკერი ვერ დავინახეთ - ჩვენ პარტია „ქართული ოცნების“ სპიკერი ვიხილეთ, ძალიან სუსტი და სამარცხვინო მესიჯბოქსით. პაპუაშვილსგან ჩვენ ვერ მოვისმინეთ ვერანაირი სახელმწიფოებრივი მიდგომა, ვერანაირი მზაობა, რომ საქართველოს სახელმწიფო ადეკვატურად აფასებდეს და რეაგირებდეს გაზრდილ რისკებზე, ცალსახად და არაორაზროვნად აფიქსირებდეს დგომას ცივილიზებულ სამყაროსთან და არა პუტინის რუსეთის ორბიტაში. ჰუმანიტარული დახმარების მობილიზების თაობაზე გაკეთებული განცხადებები სხვა არაფერია, თუ არა დამადლება ომში მყოფი ხალხისთვის. ამისთვის მთელი საქართველო დადგა, დახმარება ისეთმა ადამიანებმა გაიღეს, საკუთარი პურის ფული რომ გასჭირვებიათ. ამდენჯერ იმის ხსენება, რომ სისხლი გადაუსხეს და ჰუმანიტარული დახმარება გაიგზავნა, უკიდურესად სამარცხვინოა. ჰუმანიტარულ დახმარებას ამდენი პიარი არ სჭირდება. პარლამენტს არაფერი რომ არ გაუკეთებია უკრაინის დასახმარებლად, ამას ეს უსუსტესი გზავნილები ვერ გადაფარავს“ _ განაცხადა ანა ნაცვლიშვილმა.
