,,ნაციონალური მოძრაობის“ წევრი ლევან ხაბეიშვილი მოსამართლეებს მიმართავს და ურჩევს, ,,ქართულ ოცნებას“ ნუ ჩაყვებიან ,,პოლიტიკურ მოუსავლეთში“, რადგან, მისი თქმით, ბიძინა ივანიშვილს მალე სანქციები ელოდება.

როგორც ხაბეიშვილი აღნიშნავს, მოსამართლეების კლანი არსებობს და ამის კონკრეტული მაგალითები მოჰყავს.

,,ასეთი პოლიტიკური მიდგომა გაქვთ – ზეთი გაძვირდა? არა უშავს, პრეზიდენტი სააკაშვილი მყავს ციხეში, საწვავი ღირს 4 ლარი? მერე რა, გვარამია ხომ დავიჭირე? ყველაფერს მიხედავთ, ოღონდ ხალხის პრობლემაზე და ხალხზე არ იფიქროთ. აქედან მინდა ვუთხრა მოსამართლეებს, ნუ ჩაყვებიან პოლიტიკურ მოუსავლეთში „ქართულ ოცნებას“, რადგან ხვალ, ზეგ თქვენს მამამარჩენალსაც სავარაუდოდ სანქციები ელოდება. ამასობაში, მაღალი თანამდებობის პირებს, ვინც რუსული პროპაგანდით ხართ დაკავებული, სერიოზული პრობლემები გექმნებათ. კლანზე რატომ გწყინთ? ერთ მაგალითს მოგიყვანთ – მოსამართლე ირაკლი შენგელიას ცოლისძმაც სასამართლოში მუშაობს, დაც, დისშვილიც, დისშვილის მეუღლე – პარლამენტში და მისი ნათესავიც. მოსამართლე ილონა თოდუას მეუღლე სასამართლო ექსპერტიზის ბიუროში მუშაობს, დეიდაშვილი მოსამართლეა, მეორე დეიდაშვილიც სასამართლოში მუშაობს, ბიძაშვილი – აღსრულების ეროვნულ ბიუროში. კლანი მეტი რა არის, თუ არა ეს კონკრეტული ფაქტები“ _ განაცხადა ლევან ხაბეიშვილმა.