მსოფლიოს უმდიდრესი ადამიანი, Tesla-ს დამფუძნებელი და აღმასრულებელი დირექტორი ილონ მასკი ამბობს, რომ მას სახლი არ აქვს და მეგობრების სახლში უწევს დარჩენა.

,,არ მაქვს ჩემი საკუთარი სახლი, ფაქტიურად მეგობრების სახლში ვცხოვრობ. როცა ვმოგზაურობ Bay Area-ზე, სადაც Tesla-ს უმე­ტე­სი ინ­ჟი­ნე­რი­აა, მეგობრების სათადარიგო საძინებელში ვრჩები ხოლმე“ _ ამბობს ილონ მასკი კონფერენციების ორგანიზატორების ხელმძღვანელთან, კრის ანდერსონთან ინტერვიუში, რომელიც დღეს გამოქვეყნდა.

მასკმა, რომლის ქონება Bloomberg-ის თანახმად 251 მილიარდ დოლარად არის შეფასებული, დასძინა, რომ ბევრი ადამიანი შეურაცხყოფილია მილიარდერების კონცეფციით, სიმდიდრის გლობალური უთანასწორობის გათვალისწინებით.

,,ძალიან პრობლემურია, თუ მე წელიწადში მილიარდობით დოლარს დავხარჯავდი პირად მოხმარებაში, მაგრამ ეს ასე არ არის“_ უთხრა მასკმა ანდერსონს და დასძინა, რომ ის არ ფლობს იახტას და უარს ამბობს ძვირადღირებულ დასვენებაზე, თუმცა ცნობილია, რომ მას აქვს პირადი თვითმფრინავი.

,,ერთადერთი გამონაკლისი არის თვითმფრინავი, მაგრამ მე რომ მას არ ვიყენებდე, ნაკლები დრო მექნებოდა მუშაობისთვის“ _ თქვა მან.

მის ეკონომიურ ჩვევებზე მისი მეგობრებიც დიდი ხანია საუბრობენ. 2020 წელს მან Twitter-ზე დაწერა, რომ გაყიდის მთელ ქონებას, მათ შორის სახლსაც. 2021 წელს კი გამოცემა Insider-მა დაწერა, რომ მასკი ცხოვრობდა 50 000 დოლარის ღირებულების ასაწყობ პატარა სახლში, რომელიც მან SpaceX-ისგან იქირავა. ხოლო მისმა მეგობარმა Vanity Fair-თან ინტერვიუში ახლახანს განაცხადა, რომ მასკი ზოგჯერ „სიღარიბის ზღვარს ქვემოთ“ ცხოვრობდა.

რამდენიმე დღის წინ გავრცელდა ინფორმაცია, რომ მასკს Twitter-ის აქციების 100%-ის შეძენა 41 მილიარდ დოლარად სურს.

,,ტვიტერში ინვესტიცია ჩავდე, რადგან მჯერა მისი პოტენციალის, როგორც გამოხატვის თავისუფლების პლატფორმის მთელ მსოფლიოში და მჯერა, რომ გამოხატვის თავისუფლება სოციალური იმპერატივია მოქმედი დემოკრატიისთვის.

ჩემი შეთავაზება საუკეთესო და ბოლოა. თუ ეს არ იქნა მიღებული, მე მომიწევს გადავხედო ჩემი, როგორც აქციონერის პოზიციას“ _ თქვა მან.