მსოფლიოს უმდიდრესი ადამიანი ილონ მასკი თანახმაა, გაიღოს 6 მილიარდი დოლადი მსოფლიოში შიმშილის დასასრულებლად, მხოლოდ მას ერთი პირობა აქვს. მსოფლიო სიღარიბის დასამარცხებლად თანხის გაღების გამოწვევა ილონმა გაეროს მსოფლიო საკვების პროგრამის აღმასრულებელი დირექტორის, დეივიდ ბისლისგან მიიღო.

დეივიდ ბისლიმ ილონ მასკს მსოფლიოს უმდიდრეს ადამიანებს შორის პირველ ადგილზე გადანაცვლება Twitter-ზე მიულოცა. ბისლიმ მას ასევე შესთავაზა, გამოიყენოს უნიკალური შესაძლებლობა და 6.6 მილიარდი დოლარის გაღებით მსოფლიოში 42 მილიონი ადამიანი შიმშილისგან იხსნას.

ილონ მასკი შემოთავაზებას დათანხმდა და ამის პასუხად ტვიტერზე დაწერა, რომ იგი მზადაა ეს თანხა გაიღოს, მხოლოდ იმ პირობით, თუ გაერო საჯაროდ განათავსებს ინფორმაციას ხარჯთაღრიცხვაზე, რათა ყველამ შეძლოს და ნახოს თუ სად და როგორ დაიხარჯება ეს ფული. მისი თქმით, ის მზადაა ამისთვის ტესლას აქციები გაყიდოს.

გამოცემა Bloomberg.com-ის ინფორმაციით, ილონ მასკის ქონება ამჟამად 311 მილიარდ დოლარს შეადგენს, ხოლო 29 ოქტომბერს, მხოლოდ ერთ დღეში მისი ქონება 9.3 მილიარდი დოლარით გაიზარდა, რაც მსოფლიო შიმშილის დასასრულებლად საჭირო 6 მილიარდზეც კი მეტია. მისი კომპანია SpaceX გასულ თვეში 100 მილიარდ დოლარად შეაფასეს.