„რესპუბლიკური პარტია“ და „სტრატეგია აღმაშენებელი“ პარტია „დროას“ მიერ უკრაინაში შესაძლო სამხედრო ესკალაციის შესახებ მომზადებულ დოკუმენტს ხელს მოაწერენ.
„რეფორმების ჯგუფის“ ხელმძღვანელმა და „რესპუბლიკური პარტიის” თავმჯდომარემ, ხათუნა სამნიძემ, ჟურნალისტებს განუცხადა, რომ დოკუმენტში გათვალისწინებულია ყველა ის მკაფიო ფორმულირება, რომელსაც ოპოზიცია უკრაინის მხარდამჭერ რეზოლუციაზე მუშაობის დროს ითხოვდა.
„დროას” განცხადება, რომელიც სხვადასხვა ოპოზიციურ პარტიასთან კონსულტაციებით მომზადდა, არის ტექსტი, რომელსაც იზიარებს ჩვენი ჯგუფი - „სტრატეგია აღმაშენებელი” და “რესპუბლიკელები”. “რესპუბლიკური პარტია” იქნება ამ დოკუმენტზე ერთ-ერთი ხელმომწერი. დოკუმენტში გათვალისწინებულია ყველა ის მკაფიო და მკაცრი ფორმულირება, რომელსაც ოპოზიცია ითხოვდა რეზოლუციაზე მუშაობის დროს. დარწმუნებული ვარ, ამ განცხადებას ყველა ოპოზიციური პარტია შეუერთდება“ - განაცხადა ხათუნა სამნიძემ.
„სტრატეგია აღმაშენებლის“ წევრი, პაატა მანჯგალაძე, კი ამბობს, რომ დოკუმენტის შინაარსი ზუსტად ასახავს რეალობას და მათთვის მნიშვნელობა არ აქვს, ვისი ინიცირებულია დოკუმენტი. მთავარია შინაარსი.
მთავარი ფოტო: imedi.ge
