„რესპუბლიკური პარტიის“ ერთ-ერთი ლიდერი, დავით ბერძენიშვილი, „პალიტრანიუსის“ გადაცემა „ნიუსრუმში“ საუბრისას ნიკა მელიასა და ენმ-ის საკითხს შეეხო.

მისი აზრით, ალბათობა იმისა, რომ დაახლოებით, ორ კვირაში „ნაციონალური მოძრაობის“ დეპუტაციის სრული შემადგენლობა შევა პარლამენტში, არის 99%. ეს კი ნიკა მელიას საპატიმროდან გათავისუფლების შემდეგ მოხდება.

„ალბათობა იმისა, რომ, დაახლოებით, ორ კვირაში „ნაციონალური მოძრაობის“ დეპუტაციის სრული შემადგენლობა შევა პარლამენტში, არის 99%, ნიკა მელიას ამნისტიით გამოსვლის შემდეგ. მე გამიხარდებოდა ნიკა მელიას გამოსვლის სხვა ფორმები თუ მოიძებნება მანამდეც, მაგრამ ჯერჯერობით ყველაზე უფრო რეალისტური ამნისტიის კანონია, რამდენი უკმაყოფილებაც უნდა გამოთქვას ნიკა მელიამ.

ჩვენ განსაკუთრებული წვლილის აღნიშვნას არ მოვაკლებთ მის საქციელს, იმიტომ, რომ ამ ბოლო ეტაპზე, სწორედ ნიკა მელიასთან დაკავშირებულმა ამბებმა, დაკავებამ, დაპატიმრებამ, სიმტკიცემ, ამან მნიშვნელოვანწილად ხელახალი ენერგია შესძინა დასავლეთის მხარდაჭერას ოპოზიციისთვის და მივიღეთ შედეგი, რომელსაც მიესალმება ყველა, ევროკავშირი, ჩვენი მეგობარი ევროდეპუტატები, ჩვენი მეგობარი სენატორები, კონგრესმენები, სახელმწიფო დეპარტამენტი, ნატო-ს გენერალური ასამბლეა, მოკლედ ყველა პარტნიორი, წკიპზე ეკიდა საქართველოს ევროატლანტიკური პერსპექტივა. საქართველოს, როგორც სახელმწიფოს ყოფნა-არ ყოფნა ეკიდა წკიპზე.

ბოიკოტის ინიციატორი ხომ იყო „ნაციონალური მოძრაობა“? - ყველა სხვა პარტია ძალიან სწორად მოიქცა, რომ ფლაგმანი ვინც იყო ოპოზიციის, მის პოზიციას გაჰყვა, მაგრამ მოვიდა ის დრო, როცა პატარა პარტიებმა ჯამურად გადაწყვიტეს, რომ უკეთესი იქნება თუ ეს პარტია პატარა პარტიების პოზიციას გაითვალისწინებს. ამიტომ, „ნაციონალური მოძრაობა“ არ მიდის შეთანხმებაზე და ამიტომ არც კი ვაპირებთ შეთანხმებას პატარა პარტიები“ - ამ ტაქტიკამ ამოწურა შესაძლებლობები. პროცესი წავიდა პირიქით, თუ მანამდე პატარა პარტიები იყვნენ, „ნაციონალურ მოძრაობაზე“ დამოკიდებულები, ახლა „ნაციონალური მოძრაობა“ გახდა პატარა პარტიებზე დამოკიდებული, იმიტომ, რომ შარლ მიშელი, ამერიკა, წარმომადგენლები და ელჩები ჩაერთნენ საქმეში“ - განაცხადა დავით ბერძენიშვილმა.

მთავარი ფოტო: droa.ge