უწყებათაშორის საკოორდინაციო საბჭოს სხდომაზე დღეს სწავლის გადადების საკითხზე არ უმსჯელიათ. როგორც ჯანდაცვის მინისტრის მოადგილემ, თამარ გაბუნიამ განაცხადა, თუ სწავლის გადადების საჭიროება დადგება, საბჭო ამ საკითხს ისევ დაუბრუნდება. ამჯამად ძალაში რჩება ის გადაწყვეტილება, რომელიც საბჭომ ბოლოს მიიღო.
,,ჯერჯერობით დაავადებათა კონტროლის ცენტრი სასწავლო პროცესის გადავადებასთან დაკავშირებით რეკომენდაციას არ იძლევა. ყველაფერი ისე განხორციელდება, როგორც ეს დაგეგმილი იყო. თუ ამის საჭიროება დადგება, რა თქმა უნდა, საბჭო ამ საკითხს დაუბრუნდება“ _ განაცხადა თამარ გაბუნიამ.
როგორც მინისტრის მოადგილემ გუშინ განაცხადა, პანდემიის პირობებში სკოლა არის ის გარემო, რომელსაც ყველაზე გვიან უნდა შეეხოს შეზღუდვები. მისი თქმით, ვირუსის გავრცელების შანსი იმატებს და აქედან გამოსავალია მასწავლებლებისა და სხვა პერსონალის ვაქცინაცია მივიდეს თითქმის 100 პროცენტამდე.
