გავრცელების ასეთი ტემპის გათვალისწინებით,  უახლოესი 6-8 კვირის განმავლობაში, ევროპის რეგიონის მოსახლეობის 50%-ზე მეტი ,,ომიკრონის“ შტამით დაინფიცირდება. აღნიშნული განცადება ჯანდაცვის მსოფლიო ორგანიზაციის (WHO) ევროპის რეგიონულმა დირექტორმა, ჰანს კლუგემ გააკეთა.

,,10 იანვრის მდგომარეობით, 26 ქვეყანა იტყობინება, რომ კოვიდ 19-ით ყოველ კვირაში მათი მოსახლეობის ერთ პროცენტზე მეტი ინფიცირდება. ჯანმრთელობის გაზომვისა და შეფასების ინსტიტუტის“ პროგნოზით, ამ ტემპით მომდევნო ექვს-რვა კვირაში რეგიონის მოსახლეობის 50%-ზე მეტი დაინფიცირდება“ _ განაცხადა კლუგემ.

მისივე თქმით, ,,ომიკრონი“ სწრაფად გავრცელებადი შტამია და მას მუტაციები გამოუვლინდა, რომლებიც მას საშუალებას აძლევს უფრო ადვილად შეეკრას ადამიანის უჯრედებს და შეუძლია დააინფიციროს ის ადამიანებიც კი, რომლებიც ადრე იყვნენ ინფიცირებული ან ვაქცინირებული.

ბოლო მონაცემებით, საქართველოში, ,,ომიკრონის“ შტამის 600-ზე მეტი შემთხვევაა დადასტურებული. 

აღსანიშნავია, რომ კომპანია ,,ფაიზერმა“ განაცხადა, რომ მისი ომიკრონ-ვაქცინა მზად მარტში უნდა იყოს. როგორც კომპანიაში აცხადებენ, ,,ფაიზერის“ ვაქცინის მესამე, ბუსტერ დოზა კორონავირუსის ომიკრონის ვარიანტს ანეიტრალებს.