„ელ კლასიკო“ ესპანური ფეხბურთის ორი უძლიერესი წარმომადგენლის, კატალონიის ბარსელონას და მადრიდის რეალის დაპირისპირებაა, რომელმაც მადრიდის ცენტრალურ ხელისუფლებასა და კატალონიის რეგიონს შორის მუდმივი დაპირისპირების გამო, პოლიტიკური ხასიათიც მიიღო და ამიტომ ამ ორი გუნდის დაპირისპირება, არამარტო ესპანეთში, არამედ მსოფლიოს ყურადღების ცენტრში ექცევა მუდამ.

სწორედ ამ მუდმივი დაპირისპირების გამო, ბარსელონას დევიზად წლების განმავლობაში ჩამოყალიბდა “Mes que un club” (მეტი ვიდრე კლუბი).

მადრიდის რეალი სრულიად ესპანეთის მასშტაბით ყველაზე მეტი სიმპათიით სარგებლობს, ბარსელონა მეორე ადგილზეა. ეს ორი კლუბი, ბილბაოს ატლეტიკთან ერთად, არასდროს დაქვეითებულან ესპანეთის მეორე დივიზიონში.

2014 წელს, ჟურნალმა ფორბსმა, რეალი და ბარსელონა, ორ ყველაზე მდიდარ კლუბად მოიხსენია. 21-ე საუკუნეში სწორედ ეს ორი კლუბი იყო დომინანტი მსოფლიო ფეხბურთში, ახლა კი განსხვავებული სიტუაციაა, რადგან კოვიდ პანდემიამ სპორტსაც ძალიან დაარტყა და განსაკუთრებით შეეხო ესპანეთს, მეტწილად კი ბარსელონას, რომლის ვალი ამჟამად მილიარდ ევროზე მეტია.

რაც შეეხება უშუალოდ „ელ კლასიკოს“, ანუ მადრიდის რეალის და ბარსელონას დაპირისპირებას, პირველი მატჩი ამ გუნდებს შორის 1902 წელს, მადრიდში გაიმართა და ის მატჩი ბარსელონამ მოიგო 1-3. სულ კი ამ გუნდებს ყველა ტურნირზე გამართული აქვთ 279 მატჩი, საიდანაც 115 ბარსელონამ მოიგო, 102 მადრიდის რეალმა, ხოლო 62 მატჩი ფრედ დასრულდა. თუმცა განსხვავებული სურათია ოფიციალურ შეხვედრებში. თუ ამ რიცხვს გამოვაკლებთ ამხანაგურ შეხვედრებს, სადაც ბარსელონას უდიდესი უპირატესობა აქვს, მაშინ დაგვრჩება 246 მატჩი, საიდანაც 98 მადრიდის რეალმა მოიგო, 96 ბარსელონამ, 52 კი ფრედ დასრულდა.

ამ გუნდების დაპირისპირება ერთი-ორად ყურებადი გახდა 21-ე საუკუნეში, როდესაც მადრიდის რეალის ღირსებას, კრიშტიანო რონალდუ, ხოლო ბარსელონას ღირსებას, ლიონელ მესი იცავდნენ. ამ ორმა ფეხბურთელმა ეპოქა შეჰქმნეს, თითქმის ყველა რეკორდი ამ ორი მესის და რონალდუს ანგარიშზეა და ბევრისთვის ეს ორი ყველა დროის საუკეთესო ფეხბურთელია. სწორედ ამან განაპირობა „ელ კლასიკოს“ მწვერვალზე აყვანა და მსოფლიო მოვლენად გადაქცევა. მოხდა ისე, რომ რონალდუმ მადრიდის რეალი დატოვა, წელს კი ბარსელონა ლიონელ მესიმაც დატოვა, რაც დიდი ტრაგედია იყო გუნდისთვის და ეს ისევ კოვიდ პანდემიისგან გამოწვეულმა მატერიალურმა ზარალმა გამოიწვია.

მიუხედავად ყველაფრისა, ამ ორი გუნდის დაპირისპირება აქტუალურობას არ კარგავს და დღეს რიგით 280-ე (ოფიციალურ მატჩებში 247-ე) „ელ კლასიკო“ გაიმართება ესპანეთის პრიმერა დივიზიონის ეგიდით. მე-10 ტურის მატჩს ბარსელონა უმასპინძლებს. ამ ეტაპზე „ლა ლიგას“ მოულოდნელად რეალ სოსიედადი ლიდერობს, რომელსაც 20 ქულა აქვს. მადრიდის რეალი 17 ქულით მე-3 ადგილზეა, ბარსელონას კი 15 ქულა აქვს და მე-8 ადგილზე იმყოფება, ბარსას და რეალს სხვა გუნდებთან შედარებით 1 მატჩით ნაკლები აქვთ ჩატარებული.

კოვიდ პანდემიის შემდეგ პირველად, კატალონიის ხელისუფლებამ მიიღო გადაწყვეტილება და მოედანზე მაყურებლის 100% დაუშვა, ეს კი ნიშნავს გადაჭედილ „კამპ ნოუს“, რაც კიდევ დიდი ინტერესს სძენს ამ მატჩს.

დღევანდელი „ელ კლასიკო“, თბილისის დროით 18:15 საათზე დაიწყება.