ისრაელი პირველი ქვეყანაა მსოფლიოში, რომელმაც მოდის ინდუსტრიაში ბეწვეულით ვაჭრობა აკრძალა. ამით მან ისტორია შექმნა. ქვეყნის გარემოს დაცვის მინისტრმა, გილა გამლიელმა ოთხშაბათს, 9 ივნისს ხელი მოაწერა კანონს, რომელიც ამ წლის დეკემბერში ძალაში შევა.

,,ბეწვის ინდუსტრიას მსოფლიოში მილიონობით ცხოველის სიცოცხლე ეწირება, რაც ცხოველთა მიმართ ენითაღუწერელი სისასტიკე და წამებაა. ჩვენ ყველა ერთად გავხდით ისრაელის ტანსაცმლის ბაზარს ეკოლოგიურს ისე, რომ შევინარჩუნოთ ჰუმანური დამოდიკებულება ცხოველების მიმართ“ _ განაცხადა გამლიელმა.

გადაწყვეტილებას დიდი სიხარულით შეხვდნენ ცხოველთა დამცველები და ცხოველთა დამცველთა ჯგუფები, როგორიცაა მაგალითად PETA, რომელმაც ახალ კანონს უწოდა გამარჯვება ცხოველებისა, რომლებიც ,,იტანჯებიან და კვდებიან ადამიანთა თვითკმაყოფილების გამო“.

PETA-ს განცხადებით, ეს ისტორიული გამარჯვება უამრავ მელიას, წაულას, კურდღელსა და სხვა ცხოველებს გადაარჩენს, რომლებიც ბეწვის გამო კვდებიან.

,,ათწლეულების განმავლობაში PETA-ს და ჩვენს საერთაშორისო მოკავშირეებს სააშკარაოზე გამოგვქონდა ის შემზარავი სისასტიკე, რაც ბეწვის ფერმებში ხდება, და იმის დემონსტირებას ვაკეთებდით, თუ როგორ ატარებენ ცხოველები მთელ ცხოვრებას ჭუჭყიან რკინის გალიებში. ბეწვის ფერმერები მათ მოსაკლავად ყველაზე იაფფასიანი მოკვლის მეთოდებს იყენებენ, როგორიცაა კისრის მოტეხვა, გაგუდვა, მოწამვლა და ელექტროდენის დარტყმით მოკვლა“ _ აცხადებს PETA.

,,გარდა ჰუმანური მიზნებისა, არის სხვა მიზეზიც თუ რატომ უნდა გაიმეორონ სხვა ქვეყნებმა ისრაელის მაგალითი. ფერმებში ცხოველები ვიწრო სივრცეში ჩაჭყლეტილი, დაავადებული და დასტრესილები არასანიტარულ პირობებში არიან. ამით ბეწვის ფერმები იდეალურ გარემოს ქმნიან მომაკვდინებელი დაავადებების გავრცელებისათვის. კორონავირუსის ახალი სახეობა წაულების ფერმებში უამრავ ქვეყანაში აღმოაჩინეს, ეს ქვეყნებია: კანადა, დანია (სადაც ვირუსის ამ შტამმა ადამიანებიც დააინფიცირა), საფრანგეთი, საბერძნეთი, იტალია, ლატვია, ლიტვა, ნიდერლანდები, პოლონეთი, ესპანეთი და აშშ. რამაც შედეგად ათობით მილიონი ცხოველის დაკვლის აუცილებლობა გამოიწვია“ _ წერს PETA.