ნამახვანჰესის მოწინააღმდეგეთა აქციის ერთ-ერთი ორგანიზატორის, ვარლამ გოლეთიანის განცხადებით, ხელისუფლებას მათთან ჯანსაღი კომუნიკაცია არ სურს.
,,ჩვენ მათ კონკრეტულად ვუთხარით, რომ მივიდოდით პარლამენტთან და დაგვლაპარაკებოდა. ან ჩვენ, რამდენიმე ადამიანი შევიდოდით პარლამენტში და პროცესი მედიისთვის ყოფილიყო ღია. სცენიდან დავუკავშირდით მათ და მოვთხოვეთ, გაეგებინებინათ პასუხი. ვუთხარით, რომ ერთი საათი ველოდებოდით და გაეგებინებინათ, რა ჰქონდათ სათქმელი, როგორ აპირებდნენ დიალოგს. თავად აღარ დაგვიკავშირდნენ, ამიტომ გავაგრძელეთ პროტესტი. ჩვენ აბსოლუტურად ყველა ეტაპზე მზად ვართ რეალური კომუნიკაციისთვის, რომელიც წარმოაჩენს მათ სახეს. პირდაპირ რომ გითხრათ, მათ ჯანსაღ კომუნიკაციაში ჩვენთან ურთიერთობა არ სურთ“ _ ამბობს ვარლამ გოლეთიანი.
მისივე თქმით, ისინი ორჯერ იყვნენ საკომიტეტო მოსმენებზე, ყველა კითხვა დაისვა, რაც შეიძლებოდა, რომ დასმულიყო, თუმცა ამას პროცესზე არანაირი ადეკვატური შედეგები არ ჰქონია, ამიტომ დისკუსიაში მონაწილეობის მიღებას აღარ აპირებენ.
