ნამახვანჰესის საწინააღმდეგო აქციის ერთ-ერთი ორგანიზატორი, ვარლამ გოლეთიანი დაფინანსების საკითხზე საუბრობს. მისი თქმით, აქციის ორგანიზატორების მისამართით აგორებულია შავი პიარკამპანია, ამიტომ ფინანსების საკითხი სპეკულაციის საგნად რომ არ დარჩეს, დაიქირავეს აუდიტი, რომელიც ყველაფერს აღრიცხავს და შემდეგ ყველაფერი ფეისბუქზე გამოქვეყნდება და დაფინანსებასთან დაკავშირებით ყველა კითხვას გამჭვირვალედ გაეცემა პასუხი.
,,დაფინანსებასთან დაკავშირებით არის აგორებული ასე ვთქვათ შავი პიარკამპანია ჩვენი მისამართით. იცით, რომ დაფინანსების პროცესში ჩვენი ემიგრაცია არის ჩართული და ძირითადად მათგან არის დაფინანსება. ჩვენი საზოგადოება, მათ შორის ვინც აქ ვდგავართ, ყველანაირი სახის მონაწილეობას იღებს პროცესში, ფინანსურს, ფიზიკურს, მორალურს, რაც არის უნიკალური შემთხვევა დამოუკიდებელი საქართველოს ისტორიაში. პირადად მინდა, დიდი მადლობა გადავუხადო იმ ხალხს, ვინც ასე გულმხურვალედ მონაწილეობს ამაში. ამიტომ ფინანსების საკითხი კიდევ სპეკულაციის საგნად რომ არ დარჩეს, დავიქირავეთ აუდიტი, რომელიც ხარჯებს ყველაფერს დააბალანსებს, რა მოვალეობაც ეკისრება, შეასრულებს და შემდეგ გამოქვეყნდება ეს ყველაფერი ჩვენს ფეისბუქგვერდზე. ამიტომ ამასთან დაკავშირებით რა კითხვაც არსებობს, გამჭვირვალედ გაეცემა პასუხი“ _ ამბობს ვარლამ გოლეთიანი.
ასევე იგი გამოდის ინიციატივით, რომ ყველა ადამიანმა, ცალკეულმა პერსონამ, მათ შორის მედიასაშუალებებმა, სხვადასხვა ორგანიზაციამ, პოლიტიკურმა პარტიებმა და ასე შემდეგ, რომლებიც გარკვეული დაფინანსებით არსებობენ, თითოეულმა მათგანმა გაასაჯაროოს თავიანთი შემოსავლის ნუსხა. მისი თქმით, სამართლიანი იქნება, თუ ყველა ერთად მოექცევა ამ საერთო წესის ქვეშ.
