რიონის ხეობაში ისევ ხმაურია. აქციის მონაწილეების თქმით, ისინი ბარიკადებთან ყოველ საღამოს მივლენ და პროტესტს ხმაურით გამოხატავენ. რიონის მცველის, მაკა სულაძის განცხადებით, მათ მიმართ კონსტირუციური უფლება ირღვევა, რადგან საკუთარ მიწაზე კონტროლის ქვეშ არიან და თავისუფლად გადაადგილების საშუალება არ აქვთ.
,,მითხარით, ეს როგორი დამოკიდებულებაა საკუთარი მოქალაქეების მიმართ? კომპანიას უქმნიან სასათბურე პირობებს და ჩვენს მიმართ დარღვეული კი არა, თავზე დახეული გვაქვს კონსტიტუცია. გამოდის მერე პრემიერ-მინისტრი და ამბობს, ქვეყანა კანონის ძალით უნდა იმართებოდესო. გეკითხებით, რომელ კანონზეა აქ ლაპარაკი, გამაგებინეთ. ერთი კვირაა სახლში არ ვყოფილვარ. მე არ ვიკადრებ და არ შევეხვეწები პოლიციის უფროსებს კოკა მაისურაძესა და სულხან თამაზაშვილს რომ სახლში გამიშვან. ეს ჩემი მიწაა, აქ თავისუფლად დავდივარ და თავისუფლად უნდა ვიარო. ეს ჩემი შეურაცხყოფაა, რომ მუდმივად კონტროლის ქვეშ ვიყო და ისე ვიარო ჩემს სახლში, მიწაზე. ესაა ჩემი სათქმელი“ _ ამბობს მაკა სულაძე.
