ლიეტუვის საგარეო საქმეთა მინისტრის, გაბრიელიუს ლანდსბერგისის ინფორმაციით, საქართველო ლიეტუვასგან კორონავირუსის საწინააღმდეგო ვაქცინის 15 000 ახალ დოზას მიიღებს. მინისტრმა ამის შესახებ ტვიტერის პირად გვერდზე დაწერა.
მინისტრის განმარტებით, ვაქცინის დოზები აღმოსავლეთ პარტნიორობის ქვეყნებისთვისაა განკუთვნილი, საქართველოს გარდა, კი ახალ დოზებს ლიეტუვისგან უკრაინა და მოლდოვაც მიიღებენ.
"მთავრობის მხრიდან დადასტურდა 200 000 დოზა ვაქცინა აღმოსავლეთ პარტნიორობის ქვეყნებისთვის. ვიწყებთ უკრაინით - 100 ათასი ვაქცინა, საქართველოს 15 ათასი დოზა, მოლდოვას - 11 ათასი დოზა. პატარა ნაბიჯი ლიეტუვისგან. იმედია, ჩვენი პარტნიორები ევროპიდან სოლიდარობის აქტს შემოუერთდებიან" - დაწერა მინისტრმა.
ფოტო: Guardian.ge
