ლიეტუვის საგარეო საქმეთა მინისტრმა, გაბრილიუს ლანდსბერგისმა, საქართველოში ვიზიტი დაასრულა.
ჟურნალისტებთან საუბრისას მან ხაზი გაუსვა იმ ფაქტს, რომ შარლ მიშელის დოკუმენტზე ხელმოწერა მნიშვნელოვანი წინ გადადგმული ნაბიჯია, თუმცა, ეს შეთანხმების საბოლოო ხაზი არ არის და ის მთელი სიზუსტით უნდა განხორციელდეს.
გარდა ამისა, ის ნიკა მელიას მოუწოდებს გაითვალისწინოს ის გარანტიები, რომლებიც შეთავაზებულია ევროპის პოლიტიკური კოლეგებისგან და პარტნიორებისგან.
„შეთანხმება არ არის საბოლოო ხაზი. შეთანხმების ხელმოწერა ძალიან მნიშვნელოვანი წინ გადადგმული ნაბიჯია, მაგრამ პოლიტიზებული მართლმსაჯულება, ამბიციური საარჩევნო და სასამართლო რეფორმები, ძალთა გადანაწილება პარლამენტში, ეს ის საკითხებია, რომლებიც უნდა მოგვარდეს.
მინდა ხაზი გავუსვა იმას, რომ 19 აპრილის შეთანხმება უნდა იყოს განხორციელებული ყოველგვარი გადახვევის გარეშე, მთელი სიზუსტით. მოვუწოდებ ბატონ მელიას გაითვალისწინოს ის გარანტიები, რომლებიც შეთავაზებულია ევროპის პოლიტიკური კოლეგებისგან და პარტნიორებისგან.
ძალიან მნიშვნელოვანია, რომ ყველა პოლიტიკურმა პარტიამ და არჩეულმა პარტიის წევრებმა გამოხატონ სურვილი, რომ შეუერთდნენ იმ ძალისხმევას, რომელიც ზემოაღნიშნული შეთანხმების სწრაფ და დაუყოვნებლივ განხორციელებას უზრუნველყოფს“ - განაცხადა გაბრიელიუს ლანდსბერგისმა.
მთავარი ფოტო: baltictimes.com
