ამერიკის შეერთებული შტატების საელჩო საქართველოში განცხადებას ავრცელებს. როგორც საელჩოს მიერ გავრცელებულ განცხადებაშია ნათქვამი, ,,უცხოეთის აგენტების შესახებ“ კანონის მიღება შეუთავსებელია საქართველოს ევროპასთან ინტეგრაციის აშკარა სურვილთან და ის დააზიანებს საქართველოს ურთიერთობას სტრატეგიულ პარტნიორებთან.
,,დღეს საქართველოს დემოკრატიისთვის შავი დღეა. პარლამენტის მიერ კრემლისგან შთაგონებული კანონების განხილვის გაგრძელება შეუთავსებელია საქართველოს ევროპასთან ინტეგრაციის აშკარა სურვილთან და ქვეყნის დემოკრატიულ განვითარებასთან. ამ კანონების გატანა დააზიანებს საქართველოს ურთიერთობას სტრატეგიულ პარტნიორებთან და ძირს გამოუთხრის მნიშვნელოვან საქმეს, რომელსაც უამრავი ქართული ორგანიზაცია თანამოქალაქეების დასახმარებლად აკეთებს. ეს პროცესი და კანონპროექტები რეალურ კითხვებს აჩენს მმართველი პარტიის ერთგულებაზე ევროატლანტიკური ინტეგრაციისადმი" _ ნათქვამია საელჩოს მიერ გავრცელებულ განცხადებაში.
პარლამენტში ამ წუთებში ,,ხალხის ძალის“ მიერ დაინიცირებული ,,უცხოელი აგენტების შესახებ“ კანონპროექტების განხილვა მიმდინარეობს. ამ კანონის წინააღმდეგ ათასობით ადამიანი პარლამენტის შენობასთან აქციას მართავს. აქციის მონაწილეებმა რუსთაველის გამზირი გადაკეტეს.
