ხუთი ოპოზიციონერი დეპუტატი პარლამენტის თავმჯდომარეს მიმართავს, სხდომათა დარბაზში „ხალხის ძალის“ წარმომადგენლებს ადგილები შეუცვალოს. ამ მოთხოვნით შალვა პაპუაშვილს თეონა აქუბარდიამ, ხათუნა სამნიძემ, ანა ნაცვლიშვილმა, თამარ კორძაიამ და ტარიელ ნაკაიძემ მიმართეს. დეპუტატები მოთხოვნის მიზეზად „ხალხის ძალის“ მხრიდან შეურაცხმყოფელი მიმართვებს ასახელებენ.
„ბატონო შალვა, საქართველოს პარლამენტის სასახლის პლენარულ სხდომათა დარბაზში, ოპოზიციის ფლანგზე სხედან საზოგადოებრივი მოძრაობა „ხალხის ძალის“ წარმომადგენელი პარლამენტის წევრები. აღნიშნული ჯგუფის მხრიდან 2023 წლის 21-22 მარტის პლენარული სხდომის მიმდინარეობისას ოპოზიციის მისამართით ისმის შეურაცხმყოფელი ხასიათის რეპლიკები და დღეს, 22 მარტს ეს ყოველივე ფიზიკურ დაპირისპირებაშიც გადაიზარდა, კერძოდ, პარლამენტის წევრი ვიქტორ ჯაფარიძის მხრიდან. ბატონო შალვა, ვინაიდან „ხალხის ძალის“ წარმომადგენელი პარლამენტის წევრების მხრიდან მსგავსი ქმედებები არის მუდმივი დაპირისპირების კერა, გთხოვთ, მიიღეთ შესაბამისი ზომები და აღნიშნულ დეპუტატთა ჯგუფს შეუცვალეთ ადგილი სასესიო დარბაზში“, – ნათქვამია განცხადებაში.
ცნობისთვის, დღეს პარლამენტის პლენარულ სხდომაზე დეპუტატებს შორის დაპირისპირება მოხდა. ,,ხალხის ძალის“ დეპუტატმა ვიქტორ ჯაფარიძემ ოპოზიციონერ დეპუტატს ტარიელ ნაკაიძეს მიკროფონი ესროლა.
