,,ჯერ ჩვენს სახელმწიფოს ვცემთ პატივს და შემდეგ სხვა ქვეყნებსა და მათ მმართველებს“ _ ბექა დავითულიანი ზელენსკიზე
ზელენსკის არ უნდა დაავიწყდეს, რომ სააკაშვილი უკრაინიდან საქართველოს საზღვრის უკანონო კვეთაშია ბრალდებული... ზელენსკი თუ ზრუნავს და წუხს თავის მოქალაქეებზე, ჩვენ ჩვენს მართლმსაჯულებაზე და მოქალაქეებზე ვზრუნავთ, ამის უფლება გვაქვს. ამის შესახებ ,,ქართული ოცნების“ დეპუტატმა ბექა დავითულიანმა განაცხადა. ამით იგი უკრაინის პრეზიდენტის, ვოლოდიმირ ზელენსკის გუშინდელ განცხადებას გამოეხმაურა.
,,ზელენსკიმ განაცხადა, რომ სააკაშვილზე საუბრობს, როგორც უკრაინის მოქალაქეზე და მასზე წუხს, როგორც უკრაინის მოქალაქეზე. ჩემი პასუხია – ზელენსკიმ უნდა იცოდეს, რომ უკრაინის მოქალაქე მიხეილ სააკაშვილი მსჯავრდებულია საქართველოს მოქალაქეების კუთვნილი ცხრა მილიონი ლარის მითვისება-გაფლანგვაში, საქართველოს მოქალაქის მკვლელების წინასწარი განზრახვით შეწყალებაში და საქართველოს პარლამენტის წევრის სასიკვდილოდ ცემის ორგანიზებასა და დავალებაში. შესაბამისად, თუ ის ზრუნავს თავის მოქალაქეზე და წუხს, ჩვენ ჩვენს მართლმსაჯულებაზე, ჩვენს მოქალაქეებზე ვზრუნავთ და ჩვენ ამისი უფლება გვაქვს. არ უნდა დაავიწყდეს ზელენსკის, რომ სააკაშვილი უკრაინიდან საქართველოს საზღვრის უკანონო კვეთაში პირდაპირ არის ბრალდებული და თავადაც ამას ვერ უარყოფს. გადმოკვეთა უკრაინიდან საქართველოს საზღვარი უკანონოდ, შესაბამისად, საქართველოს მართლმსაჯულება სრულდება ისე, როგორც ამას მოითხოვს ქართული კანონმდებლობა და ჩვენ ჯერ ჩვენს თავს და სახელმწიფოს ვცემთ პატივს, შემდეგ სხვა ქვეყნებს და მათ მმართველებს" _ აღნიშნავს დავითულიანი.
დავითულიანი ყოფილი პრეზიდენტის სასამართლო პროცესზე დისტანციურად ჩართვისას გაკეთებულ განცხადებასაც გამოეხმაურა, სადაც სააკაშვილმა თქვა, რომ თუ უკრაინის გამარჯვებამდე ვერ იცოცხლებს, მისი გული უკრაინაში იყოს დამარხული.
„არ ვიცი, საქართველოს პრეზიდენტი რომ იყავი კაცი და შემდეგ შენს გულს სხვაგან აგზავნი ფოსტით, ცოტა უხერხულია“ _ განაცხადა დავითულიანმა.
უკრაინულ მედიაში გავრცელებული ინფორმაციის თანახმად, ვოლოდიმირ ზელენსკიმ განაცხადა, რომ საქართველოს ხელისუფლება საქართველოს ყოფილი პრეზიდენტისა და უკრაინის ამჟამინდელი მოქალაქის, მიხეილ სააკაშვილის მოკვლას აპირებს. მადიის ცნობით, შეხვედრის დაწყებამდე ზელენსკის მიხეილ სააკაშვილის ამჟამინდელი მდგომარეობის ამსახველი ფოტოებიც გადაეცა.
