,,ქართული ოცნების“ წევრი ბექა დავითულიანი საფრანგეთის პრეზიდენტის განცხადებას გამოეხმაურა და აღნიშნა, რომ ევროკავშირმა გადაწყვეტილება მხოლოდ გეოგრაფიული ფაქტორით არ უნდა მიიღოს და ღირებულებითი ნაწილი უნდა გაითვალისწინოს.
როგორც იგი აცხადებს, ისეთი პირობები უნდა იყოს წარმოდგენილი, რომელიც შესრულებადი იქნება.
,,იმედი მაქვს, შესრულებად პირობებს წარმოგვიდგენენ. რომ გითხრან, სპილო ხარ და აღარ იყო სპილო, თუ არ ვარ, როგორ უნდა გადავიქცე იმად, რაც არასდროს ვყოფილვარ?
გეოპოლიტიკურ ჭრილში მისაღებ გადაწყვეტილებაზე სამწუხაროდ, გუშინ გაჟღერდა ძალიან მნიშვნელოვანი ქვეყნის ლიდერის მხრიდან, გეოგრაფია დასახელდა გადამწყვეტ ფაქტორად. იმედი მაქვს, მხოლოდ გეოგრაფიით ამ გადაწყვეტილებას არ მიიღებენ და ღირებულებითი ნაწილი იქნება უფრო მაღალი მნიშვნელობის. ერთხელ უკვე დაგვტოვა ევროპამ მე- 20 საუკუნის დასაწყისში, ერთხელ ვერ გაბედა და ვერ მოგვანიჭა მაპი, რასაც 2008 წლის ომი მოჰყვა და იმედი მაქვს, მესამედ ამ შეცდომას დასავლეთი არ დაუშვებს კავკასიაში. არც ჩვენ და არც მათ სხვა გზა არ აქვთ, კანდიდატის სტატუსი უნდა მოგვანიჭონ ვინაიდან, თუ ამას არ მოგვანიჭებენ, ეს იქნება პირდაპირი სიგნალი რეგიონში არსებული სხვა ძალებისთვის, რომ პრინციპული არ არის დასავლეთისთვის კავკასია“ _ განაცხადა ბექა დავითულიანმა.
