,,უკრაინის მხრიდან მტრული გადაწყვეტილებაა" - ამ სიტყვებით კულტურის მინისტრი თეა წულუკიანი ბიძინა ივანიშვილის ოჯახის წევრების მიმართ დაწესებულ სანქციებს ეხმაურება. მისი თქმით, უკრაინის ხელისუფლების მხრიდან ეს არის მორიგი მცდელობა საქართველო საომარ მოქმედებებში ჩააბან.
,,სანქციები, რომელიც ბიძინა ივანიშვილსა და მისი ოჯახის წევრებს დაუწესა უკრაინის ხელისუფლებამ, ეკუთვნის უშიშროების საბჭოს, როგორც გადაწყვეტილება. უშიშროების საბჭოს ხელმძღვანელი კი ის პირია, რომელიც ჩვენს ერს, საქართველოს, ჩვენს სამშობლოს მოუწოდებდა ომში ჩართვისკენ და არ ადარდებდა, რა გავლენას იქონიებდა ეს ჩვენს თაობებზე და იმ ოკუპირებულ ქვეყანაზე, რომელიც უკრაინაზე ადრე იყო. შესაბამისად, ეს გადაწყვეტილება რასაკვირველია, გასაკვირი არ არის. პირადად არ მგონია, რომ გადაწყვეტილებას რაიმე კონკრეტული ეფექტი შეიძლება, ჰქონდეს სანქცირებულ პირებზე, მაგრამ ძალიან სამწუხაროა, რბილად რომ ვთქვა, ქვეყანა, რომელიც ამბობს, რომ მეგობარ სახელმწიფოდ რჩება, ასეთ მტრულ გადაწყვეტილებებს იღებს და ალბათ ეს უნდა აღვიქვათ, როგორც უშიშროების საბჭოსგან მომდინარე გადაწყვეტილება, როგორც მორიგი მცდელობა, საქართველო ჩააბან საომარ მოქმედებებში, მაგრამ ეს არ მოხდება".
