შეეძლოთ უკრაინაში იქამდე დაეკითხათ, სანამ შეფუთულს გამოგვიგზავნიდნენ. ამის შესახებ თეა წულუკიანმა მიხეილ სააკაშვილის უკრაინაში გადაყვანასთან დაკავშირებით განაცხადა. მისი თქმით, ეს არის მცდელობა, რომ როგორმე სააკაშვილი უკრაინაში დაბრუნდეს და რეალურად ამის საჭიროება არ არსებობს.
,,რასაკვირველია, სამართლებრივად და თეორიულად ეს შესაძლებელია, მაგრამ ამას ის სახელმწიფო წყვეტს, სადაც კონკრეტული პატიმარი იმყოფება და ამ გადაწყვეტილებაში ვერავინ ჩაერევა. ამ შემთხვევაში, ეს ქვეყანა საქართველოა. მე დღეს არ მაქვს კომპეტენცია, ესა თუ ის პოზიცია დავიჭირო, მაგრამ მაქვს ჩემი აზრი - პენიტენციური სამსახური ასეთ და უფრო მძიმე ადამიანებს ყოველთვის წარმატებით უვლიდა და მზრუნველობდა. ამიტომ მე არ მგონია, რომ იქ რაიმე მკურნალობის პრობლემა იყოს. ასევე, რა თქმა უნდა, კითხვის ნიშნის ქვეშ არის, რამდენად სწორია პაციენტის მიერ საკუთარი თავის სამედიცინო მდგომარეობის შეფასება, რამდენად ობიექტურია - ეს რა თქმა უნდა, ექიმმა თქვას. ისინი, ვინც მას აფასებენ, ამბობენ, რომ მდგომარეობა სრულად სამედიცინო კონტროლს ექვემდებარება.
არის თუ არა ის ტრანსპორტაბელური, ეს ცალკე საკითხია. საქართველოს სახელმწიფო თვლის თუ არა, რომ ის დაკითხვის მიზნით უკრაინაში უნდა გადაიყვანონ, ეს მეორე საკითხია და ამაზე უფლებამოსილმა უწყებამ უნდა უპასუხოს. მე კი ვთვლი, რომ ამის საჭიროება არ არსებობს, ვინაიდან სააკაშვილი ძალიან ბევრი წელი იქ ჰყავდათ, მისი გაძევების საქმეზე გამოძიება რამდენიმე წლის განმავლობაში მიმდინარეობდა და შეეძლოთ, ეს ადამიანი ნებისმიერ დროს დაეკითხათ, სანამ საქართველოში შეფუთულს გამოგვიგზავნიდნენ. ეს უფრო იმას ჰგავს, რომ როგორმე სააკაშვილი უკრაინაში დაბრუნდეს. ეს საბაბს უფრო ჰგავს, ვიდრე საჭიროებას.
