საქართველოს კულტურის, სპორტისა და ახალგაზრდობის მინისტრი, თეა წულუკიანი აშშ-ის საელჩოსთან მომხდარ ინციდენტს გამოეხმაურა. როგორც მან აღნიშნა, მმართველი გუნდის წევრები მუდმივი თავდასხმის და შეურაცხყოფის ქვეშ არიან, რასაც ხშირ შემთხვევაში ითმენენ, თუმცა ზოგჯერ ვერ ითმენენ.
,,ეს ინციდენტი კიდევ ერთხელ ადასტურებს, რომ მმართველი გუნდის წარმომადგენლები მუდმივი თავდასხმის და შეურაცხყოფის ქვეშ ვართ, აქამდე ეს ხდებოდა ვერბალურად, ახლა უკვე ფიზიკურადაც, გვივარდებიან ოჯახებში. აშინებენ ბავშვებს, ვინც იქ დახვდებათ, აშინებენ პენსიონერ მშობლებს. ჩვენ გვმართებს კიდევ უფრო მეტი სიფრთხილე, რადგან როგორც ჩანს, აგონიაში მყოფი ძალა იკადრებს ყველაფერს, ინდივიდუალურ და სახელმწიფო დონეზე. ისინი ყველაფერზე არიან წამსვლელები, ამიტომაც თითოეულმა ადამიანმა, განსაკუთრებით პოლიტიკაში მყოფმა პირებმა, რაც არ უნდა ძნელი იყოს, გამოვიჩინოთ მეტი მოთმინება, მაგრამ ჩვენც ადამიანები ვართ და ხან მოვითმენთ, ხან აღმოჩნდა, რომ ვერ მოვითმინეთ. ხან მოვითმენთ არის შემთხვევების 99.9 პროცენტში და ათი წელია, მოთმინებით ვართ დაკავებული. ადამიანი ხარ და ხანდახან შეიძლება, ვერ მოითმინო. უნდა იყო ძალიან, ძალიან ფრთხილად სახელმწიფო დონეზე, ინდივიდუალურ დონეზე. ვინაიდან ისინი უკვე ჩიხში მოქცეულები არიან, ყველაფერზე წავლენ, რათა როგორმე გამოიწვიონ დესტაბილიზაცია და ალბათ დაგეგმავენ კიდევ მრავალ სხვა მსგავს პროვოკაციას“ _ განაცხადა თეა წულუკიანმა.
