დეოლიგარქიზაციის საკითხზე პარლამენტის იურიდიულ საკითხთა კომიტეტის ფარგლებში შექმნილი სამუშაო ჯგუფი პირველ სხდომას მართავს. ჯგუფს ,,ქართული ოცნების“ დეპუტატი ანრი ოხანაშვილი უხელმძღვანელებს.
როგორც ოხანაშვილმა პრეზენტაციისას განაცხადა, უკრაინული კანონი ოთხ ძირითად კომპონენტს ეფუძნება. ეს არის: შესაბამისი პირის პოლიტიკაში ჩარევის კომპონენტი; დიდი ოდენობით ფინანსური რესურსის კომპონენტი, რომელიც საარსებო მინიმუმი გამრავლებული ერთ მილიონზე გამოითვლება; მედიაზე ზეგავლენა და ბაზარზე დომინირებული მდგომარეობის ქონა.
“უკრაინული მოდელის მიხედვით, თუკი ამ ოთხი კომპონენტიდან სამი დაკმაყოფილებული იქნება, პირი ოლიგარქად მიიჩნევა“ _ განაცხადა ოხანაშვილმა.
მისივე თქმით, ის ჯგუფები, ვინც სამუსაო პროცესის საწინააღმდეგოდ მოქმედებენ, ისინი პირდაპირ ეწინააღმდეგებიან პირველ პუნქტს, რასაც დეპოლარიზაცია ჰქვია.
,,ჩვენ პირველი პუნქტის შესაბამისად ვმოქმედებთ. დეპოლარიზაციის ერთ-ერთი მთავარი დანიშნულება არის სწორედ პოლიტიკურ პარტიებს შორის დიალოგი კონკრეტულ საკითხზე მუშაობისთვის. რაც შეეხება სხვა პოლიტიკურ ჯგუფებს, ოპონენტები ვინც ამ პროცესის საწინააღმდეგოდ მოქმედებენ, ისინი პირდაპირ ეწინააღმდეგებიან პირველ პუნქტს, რასაც ჰქვია დეპოლარიზაცია, ვინაიდან ალტერნატიული ე.წ. ჯგუფების შექმნა, რომელსაც არც პოლიტიკური და არც სამართლებრივი ლეგიტიმაცია არ გააჩნია, სხვა არაფერია თუ არა პოლარიზაცია და ამ პოლარიზაციის გაღრმავება. ჩვენ ვმოქმედებთ ჩვენი პასუხისმგებლობის ფარგლებში და ჩვენი პასუხისმგებლობის შესაბამისად ინტენსიურ სამუშაო პროცესზე გადავდივართ" _ განაცხადა ოხანაშვილმა.
ოპოზიციიდან სამუშაო ჯგუფის საქმიანობაში მონაწილეობას იღებენ: ,,მოქალაქეები“, ,,გირჩის“ წარმომადგენლები და ,,ევროპელი სოციალისტები“, ასევე, უფრაქციო პარლამენტის წევრები.
