დეოლიგარქიზაციის შესახებ კანონი შეიძლება უკრაინის რეალობას ასახავდეს, მაგრამ ნამდვილად არ ასახავა ჩვენი ქვეყნის რეალობას. ამის შესახებ პარლამენტის ვიცე-სპიკერმა, ლევან იოსელიანმა განაცხადა. მისივე თქმით, ის უკრაინული მოდელის წინააღმეგია
როგორც დეპუტატი აცხადებს, უკვე მეორე შემთხვევაა, როდესაც ,,ქართული ოცნება“ აპირებს მიიღოს ისეთი კანონი, რომელიც თვითონაც არ მოსწონს.
,,ვთვლი, რომ ეს კანონპროექტი არ შეესაბამება ჩვენს რეალობას, ის არ არის დაწერილი საქართველოსთვის, ის დაწერილია უკრაინისთვის, შესაბამისად, შეიძლება უკრაინის რეალობას ასახავდეს, მაგრამ ნამდვილად არ ასახავს ჩვენი ქვეყნის რეალობას. ამ კანონის თანახმად, შეიძლება, ადამიანი, რომელსაც არ აქვს ფული, აღმოჩნდეს ოლიგარქთა რეესტრში ძალიან მარტივად და ამავე დროს, ადამიანი, რომელსაც თავისი შრომით აქვს დაგროვილი რაღაც კაპიტალი, მაგრამ არ არის დაინტერესებული პოლიტიკით, ისიც აღმოჩნდეს ოლიგარქთა რეესტრში და შეეზღუდოს პრივატიზაცია, დაევალოს საკუთარი ანგარიშების წარდგენა, დეკლარაციების შევსება და ა.შ., რაც, რა თქმა უნდა მათ მიმართ უსამართლობა იქნება. ამ კანონს აქვს ძალიან ბევრი ხარვეზი, რომ აღარაფერი ვთქვათ ტერმინოლოგიურ ხარვეზებზე, რომელიც სრულიად ბუნდოვანია და რომელიც მრავალმხრივად შეიძლება იყოს განმარტებული და გამოყენებული. მთავარი არგუმენტი არის ის, რომ ეს კანონი ორი მოსმენით მიღებულ იქნა ყოველგვარი განხილვის გარეშე, ,,ქართულმა ოცნებამ“ თქვა, რომ ის არ აპირებს განიხილოს კანონი, უბრალოდ გადმოთარგმნა და არ შევა ამ კანონის შინაარსში, თვითონვე ამ კანონს უწოდებს სულელურ კანონს, მაგრამ, უკვე მეორე შემთხვევაა, რომ ისინი აინიცირებენ და აპირებენ მიიღონ ისეთი კანონი, რომელიც თვითონაც არ მოსწონთ. ჩვენ უნდა გამოვიდეთ ჩვენი ქვეყნის ეროვნული ინტერესებიდან და ჩვენი ქვეყნის ეროვნულ ინტერესებს მოვარგოთ ყველა კანონი, რომელსაც დავაინიცირებთ და მივიღებთ პარლამენტში“ _ განაცხადა ლევან იოსელიანმა.
