კანადის თემთა პალატამ ერთხმად აღიარა რუსეთის ქმედებები უკრაინელი ხალხის გენოციდად. ამის შესახებ კანადური პრესა იუწყება.
რეზოლუციაში ნათქვამია, რომ რუსეთმა ომის დროს ჩაიდინა „მასობრივი დანაშაულები“ და „უკრაინელი მშვიდობიანი მოსახლეობის განზრახ მკვლელობის სისტემური შემთხვევები“.
კანადის თემთა პალატის წევრმა და დოკუმენტის ავტორმა ჰეზერ მაკფერსონმა განაცხადა, რომ რუსეთის ქმედებების გენოციდად აღიარება პირველი ნაბიჯია. მან მოუწოდა მთავრობას, გაამკაცროს სანქციები რუსეთის წინააღმდეგ და გაზარდოს ჰუმანიტარული დახმარება უკრაინაში.
„ჩვენ უნდა დავაფინანსოთ საერთაშორისო სისხლის სამართლის სასამართლო და მეტი გავაკეთოთ, რათა დავრწმუნდეთ, რომ მას აქვს ყველა ინსტრუმენტი და რესურსი, რომელიც საჭიროა გამოიძიოს და ამ გენოციდის უკან მდგომ ადამიანებს პასუხისმგებლობა დააკისროს“ _ თქვა მაკფერსონმა.
