რუსი ბიზნესმენი და მეწარმე ალექს კონანიხინი ვლადიმირ პუტინის დაჭერისთვის 1 მილიონ დოლარს გადაიხდის. ამის შესახებ მან სოციალურ ქსელში დაწერა.
,,ვპირდები 1 მილიონ დოლარს მას, ვინც შეასრულებს კონსტიტუციურ მოვალეობას და რუსული და საერთაშორისო კანონმდებლობის თანახმად, დააპატიმრებს პუტინს, როგორც სამხედრო დამნაშავეს. პუტინი არ არის რუსეთის პრეზიდენტი, რადგან მან შენობის აფეთქების სპეცოპერაციით მოიპოვა ძალაუფლება, შემდეგ მან დაარღვია კონსტიტუცია, მოსპო თავისუფალი საარჩევნო სისტემა და მოაკვლევინა ოპონენტები. როგორც ეთნიკურად რუსი და რუსეთის მოქალაქე, თავს ვალდებულად მივიჩნევ, რუსეთს ნაციზმისგან გათავისუფლება გავუადვილო. მე გავაგრძელებ უკრაინის დახმარებას, და მხარს დავუჭერ მათ გმირულ მცდელობას, რათა გაუძლონ პუტინის ურდოების შემოტევას“ _ წერს ალექს კონანიხინი.
მოგვიანებით კი მან პოსტი ხელახლა გამოაქვეყნა და დაწერა, რომ მისი პირველი პოსტი ,,ფეისბუქმა“ დაბლოკა. როგორც თავად ამბობს, აკრძალვა სავარაუდოდ ვლადიმირ პუტინის იმ ფოტოს ეხებოდა, რომელიც მან პოსტს დაურთო წარწერით: ,,იძებნება! ცოცხალი ან მკვდარი“.
