პარტია "კანონი და სამართლის" ლიდერის, თაკო ჩარკვიანის განცხადებით, ოპოზიცია დღეს უფრო მეტად კოორდინიირებული უნდა იყოს და ქუჩის საპროტესტო აქციები გააგრძელოს. მისი თქმით, ექსპრეზიდენტი, მიხეილ სააკაშვილი მხოლოდ ერთი პარტიის ლიდერი არ არის და ასე რომ ფიქრობდეს, მაშინ მას გვერდით არ დაუდგებოდა. 

ჩარკვიანი ამბობს, რომ მისთვის რუსეთი წითელი ხაზია და პუტინის გასახარებლად, ქვეყნის მესამე პრეზიდენტი ციხეში არ უნდა იჯდეს. 

"არ მომწონს ეს პასიურობა. ნებისმიერი ქართველი, 5 ათასიც რომ დგას, ჩემთვის არის „აუ, რამდენი ვართ“. ვფიქრობ, არ უნდა დაშლილიყო, როდესაც 15-20 ათასი კაცი დგას გარეთ. გაღიზიანებული ვარ ხოლმე, ოპოზიციის სტრატეგია ხშირად არ ემთხვევა ჩემსას. ახლა ვნახოთ, შეიძლება რაღაც ახალი იწყება და იქნებ გამოვიდეს. რადგან არ დაიჭირა ბოიკოტი და აღმოვჩნდით იქ, [პარლამენტში] მაშინ მგონია, რომ ნებისმიერი მანდატი უნდა გამოიყენო. ვასრულებ ამას, არ გამომიტოვებია არც ღარიბაშვილის მოსვლა, არც ბრეგაძის და არც წულუკიანის. ამასთან, გარეთ უნდა დადგა დიდი მონიტორი.

სულ არ გეყოლება შენ იქ 30 ათასი, მერე რა! გარეთ დიდი მონიტორი, გარეთ ხალხი - შენი მომხრეების ერთი ნაწილი ისვენებს, შემდეგ მეორე ჩაენაცვლება. ფინანსები დაურიგე და ჯიბეში ჩაუდე - მეთქი, კი არ ვამბობ. რომ გამოგყავს ღამე ადამიანი, ეჭვი ხომ არ გეპარება, რომ შეშა და პური უნდა დაახვედრო?! ზოგიერთი „ვაი აგენტ-პროვოკატორი“ კი არ უნდა ქირქილებდეს, რომ „წულუკიანთან საპასუხოდ ტონალობა არ მომეწონა“. სულ არ მაინტერესებს, როდესაც მე ვიბრძვი ნამდვილად, გულწრფელად ჩემი ქვეყნისთვის. სხვანაირი ბრძოლა რა არის? დიდი ხნის შემოსული არ ვარ პოლიტიკაში და არ მესმის პოზები და ფსევდო მაიმუნობები. მე მინდა ჩემი შვილი დასავლური ტიპის ქვეყანაში გაიზარდოს. რომ გავერთიანდებით, ჩვენ ყველანი ერთმანეთს მივეხმარებით" – განაცხადა მან. 

ფოტო: GTMEDIA.GE