ENKA-ს მხრიდან საქართველოსთან ხელშეკრულების შეწყვეტასთან დაკავშირებით ვარლამ გოლეთიანი პირველ კომენტარს აკეთებს. როგორც იგი ამბობს, ეშინია, რომ ეს წინასაარჩევნო ტრიუკი არ იყოს.
,,ეს უდიდესი გამარჯვებაა მთელი საქართველოსთვის. ამ წუთებში გუმათში მივდივართ, იქიდან ლაივ ჩართვას გავაკეთებთ. სიმართლე გითხრათ ნამდვილად არ ველოდით ახლა ამას. მოულოდნელი იყო ჩემთვის.
ჯერ მაინც არ ვიცი რამდენად დაზუსტებული ინფორმაციაა და ცოტა შინაგანად ისე ვარ განწყობილი, წინასაარჩევნო ტრიუკივით არ იყოს.
ველოდები მაინც საბოლოო დადასტურებას ეკონომიკის სამინისტროსგან და თვითონ ENKA-მაც თავის გვერდზე რომ დაწეროს" _ ამბობს ვარლამ გოლეთიანი.
კომპანია ENKA Renewables-ი საქართველოსთან ხელშეკრულებას წყვეტს, ნამოხვანში $800 მილიონიანი ჰიდროელექტროსადგური აღარ აშენდება. ხელშეკრულების შეწყვეტის მიზეზად კომპანია მასში გათვალისწინებული პირობების დარღვევას ასახელებს.
აღნიშნულ ინფორმაციასთან დაკავშირებით ჯერჯერობით არც ეკონომიკის სამინისტროს მხრიდან და არც კომპანია ENKA-ს საქართველოს წარმომადგენლობის მხრიდან კომენტარი არ გაკეთებულა.
