საქართველოს ენერგეტიკის განვითარების ფონდის (GEDF) ხელმძღვანელმა, გიორგი ჩიქოვანმა, BM.GE–სთან ინტერვიუში „ნამახვანჰესთან“ დაკავშირებით ისაუბრა.

გიორგი ჩიქოვანი იმ რისკებზე საუბრობს, რაც შესაძლოა „ენკას“მიერ საარბიტრაჟო დავას მოჰყვეს.

„ყველაფერი უნდა გაკეთდეს, რომ ჩვენმა ქვეყანამ ეს თავიდან აირიდოს, რადგან ჩვენ არ ვართ განებივრებული დიდი ინვესტიციებით. მზარდი ეკონომიკა ვართ, გვჭირდება, რომ ინვესტორებმა აქ თავი იგრძნონ კომფორტულად და ინვესტორის მიერ არბიტრაჟში ჩივილი ჩვენი ქვეყნის რეპუტაციისადმი, საინვესტიციო კლიმატისადმი დიდი დარტყმა იქნება. ვფიქრობ, რომ ქვეყანამ, თითოეულმა ჩვენგანმა მაქსიმალური უნდა გააკეთოს, რომ საქმე აქამდე არ მივიდეს, რადგან ინვესტორები ყოველთვის უყურებენ მათ წინამორბედს რა გამოცდილება ჰქონდა იმ ქვეყანაში და თუ ეს გამოცდილება ცუდია და არბიტრაჟით მთავრდება, ინვესტორი ქვეყნიდან გარბის, სხვა ინვესტორებს კი ნაკლები ინტერესი ექნებათ ინვესტიციების განხორციელების და საქართველოს მაგივრად სხვა ალტერნატივას აირჩევენ, სადაც უკეთესი პირობები იქნება. დიდი იმედი მაქვს, რომ ეს არ მოხდება და ჩვენ შევძლებთ "ენკასთან" თანამშრომლობის გაგრძელებას.

ეს უარყოფითად მოქმედებს ნებისმიერ პროექტზე, მხოლოდ ენერგეტიკას არ ეხება, ნებისმიერ საინვესტიციო პროექტზე მოქმედებს, როცა ქვეყანაში ხელისშემშლელი ფაქტორები არსებობს და ამას არ აქვს მნიშვნელობა, ადგილობრივი იქნება, თუ საერთაშორისო ინვესტორი. მრავალი მაგალითი გვაქვს, როცა ადგილობრივ ინვესტორსაც ექმნება ანალოგიური პრობლემები“ - განაცხადა GEDF–ის ხელმძღვანელმა.

მთავარი ფოტო: 1tv.ge