„გირჩის“ ერთ-ერთმა ლიდერმა, ალექსანდრე რაქვიაშვილმა, „პალიტრანიუსის“ გადაცემაში, „360 გრადუსი“ თბილისის მერობის კანდიდატებზე ისაუბრა. მისი თქმით, დიდი ალბათობით, ოპოზიციის კანდიდატად ნიკა მელია დასახელდება. თავად კი კახა კალაძეს მხარს არ უჭერს.

„მე რაც ვიცი კულუარულად, ნიკა მელია ყველაზე დიდი ალბათობით დასახელებული იქნება, თუმცა, მანამდე იყო სხვადასხვა ვერსიები და არ გამოვრიცხავ, რომ კიდევ რაიმე ახალი გაჩნდეს. ამომრჩევლის გადმოსახედიდან ერთ მხარეს გყავს მერი, რომელიც რაღაცნაირი მერია, მოგწონს თუ არ მოგწონს სხვა საკითხია და მეორე მხრივ, ადამიანი, რომელიც მერობას არც განიხილავს მერობად, არამედ ერთ-ერთ ეტაპს, რომ ბიძინა ივანიშვილი დაამარცხოს.

ძალიან პრაგმატულად, ჩემი გადმოსახედიდან, ამომრჩევლის დიდ ნაწილში, ისიც კი წარმომიდგენია, რომ ვიღაც კახი კალაძეს მისცემს ხმას და პროპორციულ სიაში „ნაციონალურ მოძრაობას.“ „ქართული ოცნების“ წისქვილზე წყალს ასხამს ოპოზიციის შეცდომები, რომელიც მუდმივად ხდება, ეს უფრო დიდი პრობლემაა ოპოზიციისთვის.

უშუალოდ კახა კალაძე რომ შევაფასოთ, იმდენად არ მომწონს ის, რაც ქალაქში გააკეთა, მე მაგალითად, ვერ გამოვდგები მის მხარდამჭერად, მაგრამ დაველოდოთ სხვა კანდიდატებს. ზოგადად, მე პესიმისტი ვარ, ამ ნაწილში. არავის მისცე ხმა, ამ შემთხვევაში, ესეც ალტერნატივა იქნება“ - განაცხადა ალექსანდრე რაქვიაშვილმა.

მთავარი ფოტო: girchi.com